Leerorkest 5 Schools Concert a figura 550 mucha den concierto

Diabierna tabata un dia fenomenal

• Den IMAX Theatre di Gloria Entertainment Center
• Musica ta factor determinante den desaroyo y crecemento di mucha 

ORANJESTAD (AAN): Diabierna dia 28 di juni tabata uno fenomenal, unda tabatin un bunita concierto di 550 mucha di scol basico.

    E Leerorkest 5 Schools Concert ta esun di mas grandi te awor y a tuma luga na Gloria Theatre unda un sala yen por a disfruta di un tremendo concierto di muchanan di 5 scol basico. E scolnan participante tabata Graf von Zinzendorf Basisschool, Prinses Amalia Basisschool, Colegio Laura Wernet Paskel, Aruba Adventist Academy y St. Paulus School.

   Musica ta un factor determinante den desaroyo y crecemento di un mucha. Muchanan cu ta siña toca un instrument desde chikito, ta desaroya mas confianza den nan mes. Asina nan lo tin e mesun confianza ora di enfrenta otro tareanan, retonan y actividadnan den nan bida y logra loke nan propone.

   Prome Ministro Evelyn Wever-Croes, hunto cu Ministro di Enseñansa Endy Croes tabata presente.

   “Un proyecto sumamente bunita, unda bo ta wak muchanan cu talbes nunca a toca un instrument, ta haya a traves di e Leerorkest e posibilidad pa haci esaki. Mi ta hopi contento cu Gobierno di Aruba a haya e oportunidad pa contribui substancialmente cu fondo pa e bunita proyecto aki y tambe percura pa su continuidad. Indudablemente ora inculca den muchanan e amor pa musica, e ta resalta nan talento y confianza, y esaki ta algo cu ta yuda nan mes pa nan futuro y ta yuda nos como pais,” Prome Ministro a declara.

   El a finalisa bisando: “Pabien na Leerorkest, danki na e scolnan participante cu a traha duro riba e proyecto aki y un danki y pabien na e 550 muchanan.”