Varios ambtenaar lo bay haya extra placa
- Ningun di e dos mocionnan di AVP a wordo acepta
- Trahadornan di Fundacion tambe lo haya extra placa
ORANJESTAD (AAN): Cu 12 vota pro, y 9 voto contra, Diahuebs atardi poco despues di 4:30 pm a aproba asina e Ley di Presupuesto Supletorio 2024 den Parlamento.
Hecho ta cu lo bay haci varios cambio den e presupuesto, debi cu tin mas entrada cu a worde premira aña pasa, y Gobierno a dicidi cu nan lo kier uza e placa aki pa yuda tur ciudadano cu por worde yuda na mehora nan poder di compra.
Durante añanan, inflacion a hunga un papel importante den e poder di compra di tur ciudadano, y aunke Aruba a conoce un inflacion mas abao cu resto di mundo y region, e tabata tin su efecto. Por nota si cu e inflacion ta bahando cada aña, y pa otro aña e lo ta bou di 2%. No por kita si, cu si tuma tur e añanan anterior den consideracion, e efecto negativo riba e poder di compra di cada ciudadano ta grandi. Pa por fortifica e forsa di compra, Gobierno a bin cu e nota di cambio (supletorio) na Parlamento.
Indexering: Den e Ley Supletorio, ta bay traha riba Indexering. Esaki ta pa empleadonan publico y esnan den enseñansa. Pa loke ta e indexering, gobierno a yega na un acuerdo cu sindicatonan, pero pa por ehecuta e pago, lo mester tin e aprobacion di Parlamento. E suma necesario pa cu esaki a worde inclui den e presupuesto, cu si Parlamemento aproba, empleadonan publico y maestronan lo ricibi un aumento di 6% riba nan salario cuminsando luna di Juli 2024, y na Januari 2025, un adicional di 5.7%.
Pa empleadonan di fundacion: Prome Minister a splica cu empleadonan di fundacionnan no ta cay directamente bou di gobierno. Na 2016, e gobierno di Gabinete Eman a cambia e sistema pa "output subsidie". Cu e cambio aki, gobierno no por duna placa mas na fundacionnan pa salario.
Pues gobierno ta duna un suma y ta e responsabilidad di e fundacion pa wak con e ta paga su trahadonan. Debi na e añanan di inflacion, gobierno a tuma e decision pa yuda e fundacionnan cu un suma di 2.8 miyon (eenmalig), pa asina e fundacionnan por aplica y pidi pa indexering di salario di nan trahadonan.
Aumento di reparatie toeslag: Un otro nota di cambio ta e aumento di e reparatie toeslag cu lo yuda e pensionadonan haya un aumento den nan entrada.
Empleadonan den sector priva cu salaris di 2.500 Florin of menos y Gehandicapten uitkering. Cu e nota di cambio, empleadonan cu ta traha den sector priva cu ta gana 2.500 Florin of menos y ciudadanonan cu ta depende di "gehandicapten uitkering", tambe lo haya un aumento di entrada.
