ORANJESTAD (AAN) – Minister di Husticia y Asunto Social, señor Rocco Tjon, a menciona den entrevista cu DIARIO cu recientemente,
el a reuni cu Chameleon Associates, cu ta un compania Mericano, specializa den duna consehonan pa eleva seguridad, y el a compromete cu ne caba cu e proyecto den area hotelero, y a base di nan conseho a emplea e “Bike Patrol Team” y pa fin di September awo, e minister lo haya e rapport.
“Nan ta aworaki na Aruba y nan ta papia cu tur e stakeholders, entre otro cu un grupo di comerciante den ciudad, Stichting Hunto, KPA, y nos ministerio, y nan ta bay duna un conseho. Intencion ta pa na comienzo di 2025, nos tin un ekipo mescos cu e Bike Patrol, cu ta traha bao mando di Cuerpo Policial, pa eleva visibilidad y seguridad den Caya Grandi y den ciudad di Oranjestad”, Minister Rocco Tjon a duna di conoce.
E dignatario a comenta tambe cu nan a cuminza na San Nicolas cu camara, y e distrito ta ekipa caba cu esaki. Y intencion ta pa despues sigui amplia. “Mi mester bisa cu esaki ta un proyecto cu na comienzo di e aña aki, hunto cu colega señor Geoffrey Wever, nos a reuni cu tur e comerciantenan y esaki ta loke nos a propone na nan. Nos a bisa cu nos ta bay acerca Chameleon Associates, den e caso aki pa haci e assessment pa nos, y conseha nos, y esey ta tumando lugar aworaki. Pa fin di luna nos tin e rapport anto un bez nos tin esaki, nos lo acerca e comerciantenan pa e rapport wordo presenta na nan, y pa despues wak con nos por haci esaki un cooperacion entre gobierno, comerciantenan y Aruba Hospitality Association”, Minister Tjon a indica.
