KIA ta contribui activamente na comunidad durante Aruba Doet

ORANJESTAD (AAN) – Den conexion cu e accion boluntario nacional Aruba Doet, Korrektie Instituut Aruba (KIA) a

demostra e aña aki cu nan tambe ta contribui na nos comunidad. Bou di e iniciativa nobo di “KIA Doet”, tanto empleadonan como detenidonan di KIA a traha boluntariamente pa yuda e bario di Lago Heights na San Nicolas.

            E aña aki KIA Doet a colabora cu Centro di Bario Lago Heights (CBLH), cu ta wordo considera un punto di encuentro importante pa e bario di Lago Heights. Bou di guia y supervision, detenidonan a chapi y haci e tereno rond di e centro limpi. Como resultado awo e area aki ta mas accessible pa ciudadanonan principalmente nos muchanan y hoben.

            E ta importante pa subraya cu pa e detenidonan, e proyecto aki no ta simplemente un tarea cu nan tin cu cumpli cu ne. E ta un proyecto cu ta duna nan e oportunidad pa tuma responsabilidad, pa duna nan aporte y pa sinti cu nan ta contribuyendo den un forma positivo na nos comunidad, apesar di nan pasado.

            E iniciativa di KIA Doet ta basa ariba e pensamento cu cada persona tin e balor y tambe e derecho pa haya oportunidad di haci bon den nan bida, no obstante nan pasado. KIA ta dunando su detenidonan e oportunidad pa yuda contribui na algo cu ta mas grandi cu nan mes. Di e forma aki nan por traha ariba un futuro mas positivo basa ariba compromiso y respet den nan trayecto di re-socialisacion y re-integracion.

            Cu tipo di proyectonan aki KIA kier demostra cu e trayecto di re-socialisacion y re-integracion pa su detenidonan ta cuminsa cu union y empatia. Pesey KIA  ta pone hopi enfasis ariba engrandece e colaboracion entre institucionnan y organisacionnan di bario creando impacto real y duradero pa su detenidonan den nan trayecto di re-socialisacion y re-integracion.

            No obstante cu KIA tin falta di personal, nan ta keda motiva pa sigui duna aporte valioso na nos sociedad. Esaki den cuadro cu e vision di KIA ariba re-socialisacion y re-integracion di detenidonan, den cual participacion activo y tuma responsabilidad ta fundamental. KIA tin como meta pa sigui enfoca ariba iniciativanan manera KIA Doet cu ta genera un efecto positivo tanto pa su detenidonan como pa su empleadonan.