Minister Geoffrey Wever:
ORANJESTAD (AAN): Conforme e Plan di Gobernacion 2025-2028 Gabinete AVP-Futuro y di acuerdo cu e vision di Minister di Finansa, Asunto Economico y Sector Primario, Geoffrey Wever, pa baha e costo di bida na Aruba y tambe mitiga e impacto di aumento di prijs di producto cu Aruba ta importa di Merca, cu enfoke special riba reduci gasto di alimentacion y explora expansion di importacion den region, Aruba ta prepara pa su participacion den Agroalimentaria 2025, un di e ferianan agricola mas importante di Caribe, cu lo tuma lugar di 28 te 31 di mei 2025 na Santo Domingo, Republica Dominicana.
E participacion oficial di Aruba lo ta lidera pa Departamento di Asunto Economico, Comercio y Industria (DEZHI), den colaboracion estrecho cu e Consul y Vice-Consul di e Consulado General di Republica Dominicana na Aruba. Un total di 30 comerciantenan Arubiano lo participa den Agroalimentaria 2025, representando un variedad di sector cu ta interesa especialmente den producto agrícola y bebida.
Pa kico Agroalimentaria 2025 ta importante pa Aruba?
E situacion economico mundial ta den constante cambio, cu aumento di tarifanan di importacion for di Merca y otro paisnan strategico. Pa e motibo aki, Aruba mester sigui busca alternativa sostenibel pa fortalece su economia, diversifica su lasonan comercial y explora fuentenan nobo pa importacion y inversion.
Agroalimentaria 2025 ta un plataforma strategico, caminda empresarionan Arubiano por:
Traha conexion directamente cu negoshinan Dominicano;
Amplia nan red di contacto regional;
Explora colaboracionnan nobo den e sector agricola.
Beneficionan pa comerciantenan Arubiano
Durante e feria, comerciantenan por participa den rondanan di negoshi, reunionnan directo cu exportadonan Dominicano, y asisti na conferencianan y presentacionnan relaciona cu e desaroyo actual y futuro di e sector agricola. Esaki ta duna nan e oportunidad pa examina e productonan Dominicano personalmente, evalua nan calidad, y explora posibel importacion pa Aruba.
Desde 2018, DEZHI a tuma un rol activo den coordinacion di e misionan comercial, den colaboracion estrecho cu e Consulado di Republica Dominicana na Aruba, y esey lo continua di e mesun manera den e edicion di e aña aki. Ademas, danki na sosten di gobierno Dominicano, un ruta maritimo nobo a wordo estableci entre Republica Dominicana y Aruba via Don Andres, cu ta facilita transportacion consolida di carga. Esaki ta elimina un di e mayor obstaculo logistico cu tabata existi den pasado, y lo haci participacion den Agroalimentaria 2025 ainda mas atractivo pa nos comerciantenan y importadornan.
“Cu e mision comercial aki nos ta activamente buscando mercadonan nobo, mercadonan mas economico y asina trata na baha prijs di cuminda, mitiga e impacto negativo cu e Trade War por tin y crea oportunidad nobo pa nos comerciantenan.”, segun Minister Geoffrey Wever.
