Articulo di siman
Bay scol pa prome biaha ta algo grandi pa bo yiu. Abo como mayor tin un rol importante den e proceso aki. Ora bo yiu cuminsa bay scol pa prome biaha, nan ta pasa den un periodo di cambio y adaptacion. Un cambio pa un mucha nunca tin cu pasa den un forma abrupto: e mester bay poco poco pa asina e por custuma.
Preparacion y periodo di transicion
Tin diferente manera con abo como mayor por prepara pa e prome biaha cu bo yiu ta bay scol. Papia cu bo yiu y puntr’e con e ta sinti y kico eta pensa tocante su scol. Dun’e contesta ariba tur su preguntanan. Laga bo yiu sinti cu e cambio pa bay otro scol ta algo dushi pa anticipa. Mustr’e na unda e scol ta. Cont’e un storia, splic’e cu na scol e ta bay siña cosnan nobo, cu e ta bay conoce su maestro/a y mas mucha cu e por bay hunga cu ne. Yud’e haya mas confiansa den su mes, dor di mustr’e con grandi el a bira y cuanto cos e por. Demonstr’e cu e ta un mucha balente y cuanto bo ta stim’e.
Custuma bo yiu pa e por drumi trempan, pa asina e por lanta trempan mainta, baña, y come na ora pa e no mester pura mainta of yega scol laat. Percura pa mainta bo mes no bira mucho nervioso, pa evita cu bo yiu ta haya miedo. Si bo yiu yora prome dia di scol, consol’e y papia den un manera cariñoso cu ne. Splic’e cu e ta bay pasa dushi, hunga, siña y cu despues boso lo bolbe mira otro. Duna bo yiu algo leuk cu e gusta pa hiba su prome dianan di scol, como un sosten (si scol ta acepta esaki). Lag’e hiba algo di come y bebe cu e gusta. Corda busca bo yiu na ora pa evita cu e sinti’e su so, mientras tur e otro muchanan ta bay cas.
Un bon contacto entre scol y cas ta primordial. Ta importante pa abo como mayor mantene contacto cu bo yiu su maestro/a. Puntr’e con bo yiu ta bayendo na scol. Corda combersa cu bo yiu tocante su dia na scol y puntr’e kico tur nan a haci, ki wega nan a hunga y kico el a siña.
Durante e fase di transicion, abo como mayor por ripara un cambio den e comportacion di bo yiu. Un mucha ainda no por expresa su mes cu palabra y splica bo si e tin algun problema. Un mucha por bira intrankil of nervioso: cu por caus’e dolor di barica. E por haya problema pa drumi y lanta varios biaha den anochi. Ora scol caba e por ta hopi cansa. E por asta haya miedo pa bay scol of nenga pa bay scol.
Tur esakinan ta pasahero: si tin problema di adaptacion, e problema ta temporal. Keda trankilo y papia cu bo yiu den un manera comprensivo, ora cu e ta trankilo y a descansa. No perde pasenshi. Pidi cooperacion di e otro miembronan di boso famia pa boso tur sostene e mucha durante e periodo aki. Dun’e extra atencion durante e cambio y comparti su experiencianan nobo.
Fuente: Booklet FPNM: “Bay scol pa prome biaha”.
Pa informacion of pregunta por acerca Fundacion Pa Nos Muchanan - Cumana 2
