Juby Naar como gran historiado, baluarte, periodista, y sostenedor fuerte di Teatro, Cultura y Carnaval a fayece

Hubert Naar: 1943 - 2024

ORANJESTAD (AAN): Un baluarte, periodista, locutor, maestro di ceremonia, historiado, gran culturista, y conoci pa tur hende como ‘Enciclopedia Bibo di Carnaval’, a fayece cu 80 aña di edad.

   Hubert Cornelis Naar, ta conoci pa tur hende como ‘Juby’.  Den forma chistoso tin hende ta yame ‘Chuchubi’, otro ta yame ‘Cornelis’, y tin tambe ta yame como ‘Hucona’, y por recorda su famoso columna ‘Baul di Hucona’, y bo ta realisa cu Hucona simplemente ta e prome dos letter di su nombernan y fam.

   E tabata conoci tambe como ‘Popo’, danki na su columna di tur dia den DIARIO unda e tabata suministra informacion den temporada di Carnaval.  Na Radio Carina FM e tabata e mastermind tambe tras di e show ‘Popito’, cu ta algo similar den formato cu Popo pero mas cortico pa pasa na e emisora durante Carnaval.

   Juby Naar a nace na Socotoro, y despues a muda y biba na Lago Heights, y henter su infancia a pasa eynan y pesey a conoce e berdero comienso di Carnaval den siglo pasa.  Ultimo decadanan e tabata biba na Dominicanessenstraat na Playa.

   Na comienso di su bida, e tabata un top-sportist!  El a domina hopi deporte, e.o. Basketball, Baseball, Futbol, y a hasta forma parti di Delegacion di Antiyas cu a bay competi pa un Competencia Internacional cu a ser teni na Cuba.  Esey ta net despues cu Cuba a bira comunista.  Sinembargo como cu Hulanda ta un di e poco paisnan cu no a kibra relacion cu Cuba, esey a nifica cu Cuba a duna e delegacion di Antiyas un trato di VIP, cu semper Juby a keda corda.  Mientras delegacion y atletanan di tur otro pais tabata come pan cu beleg mainta, e delegacion di Antiyas tabata ricibi cuminda completo mainta di webo, bacon, pan tosta, y mas.

   Pesey mes, Juby Naar tabata gusta traha relato di tur evento deportivo.  Su habilidad di capta cosnan durante un wega ta fenomenal, y e ta corda tur esey pa ora e traha su relato. 

Su historia cu media

Juby a cuminsa bende e corant semanal ‘The Local’ tempo e tabatin 11 aña di edad.  E tabata aparece tur Diabierna na San Nicolas, y na idioma ingles.

   E tabata skirbi articulonan tambe despues durante cu e ta bay scol, y esaki tabata sali den corant ‘The News’, tambe na ingles.

   Tempo cu e emisora “Radio Antillana” a cuminsa transmiti na frequencia di 1270 kHz AM for di nan studio cu tabata situa net patras di Lago Heights Club.  Durante e tempo di prueba di transmision, Juby Naar tur atardi tabata bay pa cende e transmisor (‘zender’), pa asina e emisora cuminsa transmiti.  Y anochi 11:00 pm e tabata bay pa paga e transmisor ora cu e programacion a finalisa.

   Ora cu e emisora a inaugura oficialmente, Juby a bira un persona cu a bira locutor na Radio Antillana.   Durante esey, el a logra haya un beca di Gobierno pa bay studia na Hulanda.

   Na Hulanda el a bay na Radio Nederland, y tambe na Nederland Televisie Stichting y aya a studia tur cos di radio y television.  A studia tur cos tambe di Film Regie, transmision di evento bibo, produccion, traha script, balansa di sonido, y tur aspecto di traha cu actornan, bo team di produccion, y hasta con pa tin un presupuesto pa evento.

   Despues di Hulanda, na Aruba e.o. el a traha na emisora Voz di Aruba riba 1320 kHz AM, tambe a traha pa RVD di Gobierno (Regering Voorlichtings Dienst), y fuera di esey a traha tambe pa Telearuba, unda e tabata locutor, y presentador di noticia.

   Den decada di 1970, el a traha tambe pa e corant ‘Prome’ cu tabatin su sede na Savaneta.  El a cuminsa labora na DIARIO, na 1980 unda e tabata un persona cu semper ta yuda demas periodista- y redactornan riba e importancia di skirbi Papiamento na forma corecto, y semper basando su mes riba e publicacion y reglanan di Papiamento aproba na 1976.

   Na 1986 el a bay yuda startup e publicacion nobo di “Matutino Corant”.  Na 1988 el a yuda startup cu Aruba su prome corant di atardi “Meridiano”.  Na 1990 el a regresa pa reforza redaccion bek di DIARIO.

   En total, Juby Naar tabata den periodismo na Aruba pa mas di 50 aña. 

Publicacionnan

Juby Naar tin par di publicacion riba su nomber, como cu e ta un persona cu ta gusta lesa y skirbi bastante.  No ta un secreto cu el a cay cera y a keda encarcela par di aña.  Den prison el a keda encarga cu Biblioteca, y esey tabata algo cu el a gusta masha hopi mes.  Fuera el a siña domina par di habilidad fenomenal, pues e por a fura stul di cas, asiento di auto, e tabata cose y traha headpiece, y tambe traha bela pa boto, etc.

   Ademas di esey, e tabata encanta skirbi libreto cu storianan pa asina inclui nan den obranan teatral, y tambe asina den decada di 1980 a fortalece su grupo yama ‘Cabaret Picante’, cu a yena salanan yen den Cas di Cultura.  E tabata crea humor net ora cu comunidad tabatin mas mester di dje.  Ainda por corda con Aruba den situacion precario na ciere di Refineria Lago, toch a acudi na su obra di comedia, pa asina mira con riba escenario un dama (Mena Dijkhoff-Erasmus, d.f.m.) ta sinta yora na un entiero dilanti un caha di morto.  Ora cu a yega momento di bay cu e caha, nan a hisa esaki.. y e ora ey hendenan a mira cu e caha no tin bom, y na su lugar tin un maquette realistico di Refineria Lago.  Pues tabata entiero di Lago e momento ey.

   Su envolvimento den Teatro tabata grandi, y tabata sinta combersa cu oranan largo cu expertonan den e tereno aki.  Su pasatempo preferi tabata Mascaruba, unda cu por a discuti y papia riba trendnan di teatro, na un nivel mas halto cu djis crea algo di comedia.  Y ora di ta presenta riba escenario, Juby tabata bay tin biaha e ‘extra mile’ pa haci hasta actonan fisico sin sa si acaso e lo finalisa anochi cu pia of braza kibra, pero tanten cu a entretene publico.

   El a skirbi varios buki, y a haci hopi research e.o. riba origen di Carnaval, a skirbi hopi di tur e gruponan di Steelband cu tabatin na Aruba. 

Enciclopedia di Carnaval

E ta wordo considera door di hopi hende como un berdadero Enciclopedia di Carnaval.  Pesey mes Juby Naar ta e persona cu mas tabata wordo busca door di Scolnan, pa e bay duna lectura encuanto cierto aspecto di Carnaval.  El a crea pa DIARIO, e famoso “Popo” cu a bira e columna hopi gusta di Carnaval.  El a haci esey na comienso como un chansa, cu intencion di suministra humor di tur dia pa lectornan.

   Pero el a desaroya y tuma un paso diferente, y a bira un fuente informativo di Carnaval cu tur detaye di e temporada.  Tin biaha Popo tabata asina largo, cu e columna ta cubri 3 te hasta 5 pagina.

   Como cu e tabata wordo considera e persona cu wowo critico pa Carnaval, pa hopi aña durante SAC y cu Milo Croes (d.f.m.) como lider, a duna Juby e tarea pa fungi como President di Hurado pa e Paradanan Grandi di Carnaval di Playa y San Nicolas.  E tabata encarga pa busca miembronan di hurado, duna nan un curso relampago con pa observa tur carosa, roadpiece, bodypiece, y cumplimento di musica, y asina tabata yuda e cuerpo di hurado bira mas fuerte riba caya.

   Juby Naar tabata maestro di ceremonia pa mas di 60 aña pa actividadnan rond di e isla, y no djis pa Carnaval.  E tabata anfitrion pa evento di ‘Bon Bini Festival’ tur Diamars anochi na Fort Zoutman pa turistanan.  Tambe e tabata maestro di ceremonia pa Festivalnan di Calypso & Roadmarch, y tambe Tumba Contest pa 30 aña.

   Juby Naar tabata miembro activo tambe di e Federacion Europeo di Carnaval, esta FECC, y tabata viaha pa e paisnan Europeo pa cumbrenan cu ta ser teni pa cu topico di Carnaval. 

Pelicula di ‘Betico’

Un di su gran deseonan semper, y cu el a traha parcialmente riba e script tambe, ta pa un dia bin cu un major motion picture, pues un pelicula completo basa riba bida y logro di Betico Croes, y su plan tabata pa simplemente yama e pelicula ‘Betico’.  Esaki tabata na final di decada di 1980 y comienso di 1990, y e tempo aya caba e financiamento pa traha un pelicula asina, e tempo aya full riba film, tabata costoso y un dineral, y no tabata por a haya sponsor ni financiamento pe.

   Su analisis di pelicula of programanan di TV tabata algo spectacular pa sinta y scucha di dje.  Danki na su background di estudio, e tabata keda disgusta ora di mira directornan di programanan di TV durante show, diripiente ta hinca un imagen cu ta wordo considera un “klapbeeld”, pues un imagen di ‘reverse angle’.  Antes e tabata algo cu ta ponebo perde punto ora di haci estudio pa produccion di TV.  Si e persona riba pantaya constantemente ta mirando direccion pa su man drechi, y inespera bo ta pone imagen di e persona mirando man robes, tabata inaceptable antes.  Awor e trend nobo ta kico cu ta bo por pone riba pantaya.

   Juby Naar a fayece, sin cu hamas su soño di e pelicula ‘Betico’ a bira realidad. 

Su famoso Kashaka

Sin duda alguno, publico a mire na diferente ocasion ta cana bisti cu su ‘Kashaka’, cu el a laga “patenta” na su estilo cu un diseño di 1885, y a pone riba nan varios dibuho tipico di Aruba.  Algo admirable y cu sigur a pone hendenan reconoce Juby ya for di 1 kilometer leu.

  Juby a fayece, lagando hopi trabao ainda cu e tabatin den ‘pipeline’ pa saca nan publicacion un dia.  Sinembargo e obstaculonan cu el a topa pa saca e bukinan ey, tabata e motibo cu tin biaha e tabata djis rindi su mes y na final di dia e bukinan ey a keda sin wordo publica.

   Juby a fayece despues di un enfermedad breve y su experticio lo bay haya falta di dje.  DIARIO na nomber di Famia Mansur, ta manda palabranan di profundo condolencia na henter su famia.  Cu Todopoderoso tuma Juby den su Reino pa paz eterno.