Jeon ta habri su prome restaurant na Aruba

ORANJESTAD (AAN): Jeon ta anuncia e siman aki riba rednan social apertura di Hip Wok Restaurant. E apertura oficial di Hip Wok Aruba lo tuma lugar awe diabierna awor 28 di Januari.

Hopi preparacion a tuma lugar pa por a realisa Hip Wok Restaurant. Jeon su deseo pa Hip Wok Restaurant ta cu e por ta un localidad caminda Grandi y Chiquito por disfruta.

Jeon a comparti cu e inspiracion pa yama su Restaurant Hip Wok a bin door cu desde cu e tabatin 7 aña el a namora di musica pa prome biaha scuchando Hip Hop.

Asina e comienso di su carera a inicia den bario y den pauze na scol. E tabata fascina di freestyle rap, Beatbox y te asta breakdance.

En honor di e genero di musica aki caminda su inspiracion y carera a inicia. No tabatin un mihor nomber pa dedica su prome restaurant na dje.

Finalmente Jeon por comparti cu mundo henter na su dushi isla pa su dushi hendenan di Aruba su prome restaurant.

Den Jeon su rednan social el a comparti “Danki na boso cu ta apoya mi y motiva mi tur dia. Sin boso support esaki nunca lo a bira posibel”.