Esnan cu a studia na Hulanda, Merca y den e region:
ORANJESTAD (AAN) – Minister di Salud Publico, Dangui Oduber, a hiba palabra en ocasion di a otorga Certificado di Registracion AruBIG na 18 profesional den salud, cu ta brinda servicio pa DVG, entre otro.
E dignatario a gradici, na prome lugar, Drs. Jayburtt Dijkhoff, dr. Maritza Ordoñez y DVG cu a organiza un bunita mainta unda a reconoce y registra 18 profesional cu a studia den e ramo di medicina, y cu awo a drenta den e registro di AruBIG.
“Mi ta kere cu como Arubiano nos mester sinti hopi orguyoso cu na Aruba nos pionero den esaki, cu nos tin nos propio registro AruBIG. E no tabata un proceso facil, e tabata un proceso hopi complica, unda cu pa decadanan hopi gobierno a papia di reconoce nos yiunan di tera, hopi Arubiano a papia di AruBIG y mi ta contento cu nos a pone accion dilanti nos palabranan, y a tuma e pasonan pa awe nos por realiza y reconoce cada yiu di tera cu a studia den e region y bringa oportunidad na nos yiunan di tera pa bin bek Aruba, y yuda nos practica y mehora e calidad di cuido y servicio cu nos ta duna na nos ciudadanonan.
AruBIG a bin crea oportunidadnan nobo, el a habri horizontenan nobo pa Pais Aruba. Nos a mira recientemente, con e prome docter cu a studia den e region, den e caso aki na Colombia, a wordo brinda un contrato cu AZV caba y ta trahando.
Awe, otro muestra cu 18 profesional cu a studia medicina y ta traha den Gobierno y ta brinda e miho servicio cu nan por brinda, nos ta reconoce nan oficialmente pa medio di e registracion AruBIG. Nos kier gradici tur e profesionalnan aki, pa nan excelente trabao. Den nomber di Gobierno di Aruba nos kier felicita nan tambe, cu nan registracion.
Mi ta gradici Jayburtt tambe, cu ta haciendo un tremendo trabao desde cu nos a lanza oficialmente AruBIG y hopi paso concreto ta wordo duna na e momentonan aki. Nos ta den proceso pa cuminza cu e Instituto di Calidad y nos ta bay lanza un website di AruBIG, unda tur esnan cu a registra por haya tur informacion cu nan ta desea”, Minister di Salud a expresa. Finalmente, el a subraya cu aworaki tur profesional den salud cu a studia na Hulanda, Merca, den e region, y cu awe tur ta forma parti di AruBIG.
