Jean-Carla cu algun cosecha recien na Santa Rosa

ORANJESTAD (AAN): Na comienso di luna aki, DIARIO a raporta con personal na Santa Rosa a ricibi un studiante nobo cu ta core stage eynan,

y pesey nan a duna bon bini na e alumna Jean-Carla Fingal, di Scol Practico pa Ofishi Brasil.

   Pa cuatro siman el a bay core stage na Santa Rosa, y e tin algun dia mas pa bay, como cu ultimo dia ta 24 di Mei.  El a bay pa haya sa mas di e area di Horticultura.  A mira caba cu e hoben tin hopi interes den agricultura, y ta cla pa siña den forma practico, tur loke ta encera e tarea di traha riba cultivo, y tur cos.

   E siman aki, Santa Rosa a presenta potret di e hoben Jean-Carla cu algun di e cosecha recien cu ta logrando na e cunucu di nan mes na Santa Rosa.  Corda cu cada cosecha ta motibo pa trece alegria, y pesey busca forma pa bo planta den bo cura hunto cu henter bo famia of amistad.

   Santa Rosa mes lo bay tin nan proximo Mercado riba Diadomingo 2 di Juni venidero.  E lo ta for di 9:00 am te cu 2:00 pm, lo bay tin fruta, berdura, carni fresco, producto natural, y cuminda crioyo no por falta.  Corda bay cu bo mesun ‘poti’ of cup, shopping bag, pa asina yuda haci esaki un evento sostenibel.