Exitoso fiesta bailable pa yuda recauda fondo pa renoba Misa di Paradera

ORANJESTAD (AAN): Dentro di poco, Parokia Santa Filomena na Paradera ta celebrando e di 75 aniversario di existencia di e Misa na Paradera.

   Pa por observa su aniversario na un mihor forma, tin mester di haci trabao di renobacion pa asina e Misa keda den mihor forma pa celebra su aniversario.

   Pa recauda fondo, un comision a dicidi na organiza Diasabra cu a pasa, un “Anochi Bailable” den Renaissance Convention Center.  Tabatin animacion musical di ‘N Fuzion, Robert Jeandor y su Solo Banda Show, y Metropolis Disco.

   E fiesta a worde super bon atendi, y e Convention Center tabatin mas o menos 800 persona cu a acudi na  e fiesta.  Como cu esaki a tuma lugar e anochi na bispo di Dia di Mama, na entrada tur mama a ricibi un rosa como obsekio.

   Ora cu Dia di Mama a bati pa 12’or, Mariachi Nacional a presenta y a canta tur mama riba nan Dia.  Pastoor Toti a bendiciona tur Mama y tur persona presenta.  Tambe a gradici tur hende cu a sa di contribui di un of otro forma.

   Pista di baile tabata yen, for di 8’or cu e fiesta a start, te cu 2’or ora esaki a caba.