Datonan lo duna informacion vital pa strategianan di conservacion
ORANJESTAD (AAN): Durante e siman di 11 di April 2021, miembronan di Nature Foundation St. Maarten, Dutch Caribbean Nature Alliance (DCNA), Saba Conservation Foundation (SCF), y Beneath the Waves a haci multiple ‘prueba cientifico inicial’ como parti di e proyecto di “Shark Shakedown”.
E expedicion di investigacion tabata parti di un investigacion mas amplio di tribon tintorero den e region cu fondo di World Wildlife Fund for Nature di Hulanda (WWF-NL) pa medio di e Fondonan pa Biodiversidad y Nationale Postcode Loteria di Hulanda.
E investigadornan a captura diesun tribon y a duna nan un marca, incluso pa di prome biaha un tribon tintorero na estado y un tribon di rif Caribense cu ta un especie cu ta core peliger di extincion den Caribe Hulandes. E datonan lo duna informacion vital pa strategianan di conservacion pa no solamente St. Maarten, pero pa henter e region amplio di Caribe.
E expedicion a dura cinco dia durante cua a captura diesun tribon y a duna nan un marka, incluso tribon di santu (‘Ginglymostoma cirratum’), tribon di rif caribense (Carcharhinus perezi), y tribon tintorero (Galeocerdo cuvier) variando di especie sub-adulto pa adulto.
E participantenan a haya un training den practica cu expertonan di ‘Beneath the Waves’ como preparacion riba e expedicion pa Saba Bank na Augustus 2021. Meta di e expedicion benidero ta pa determina si Saba Bank ta un area di cuna pa tribon tintorero den Oost Caribe.
E tecnologia ultrasonico di calidad halto cu e team a usa, ta crea pa E. I. Medical Imaging y e colaborado Dr. James Sulikowski, di Universidat di Estado Arizona, a haci trabou di pionero cu esaki. A haci uso di e tecnologia aki den identificacion di e estado di madures y di e etapa di embaraso di varios specie di tribon, pa di prome biaha den region como prueba cientifico inicial den ciencia di tribon.
E cientificonan exitosamente a registra estado inicial di embaraso cerca un tribon tintorero muhe adulto y tambe nan a pega un transistor di satelite na e tribon muhe aki durante nan sesion di training den practica. Haciendo uso di siguimento di movecion di e tribon via e transistor di satelite durante e proximo lunanan benidero, e cientificonan ta spera di por confirma evidencia cu Sint Maarten ta un sitio di cuna pa e animalnan aki, cu globalmente ta den menasa di extincion.
Den un otro prueba cientifico inicial e cientifico principal di ’Beneath the Waves’, Dr. Austin Gallagher, a pone e prome marca cu camara na un tribon tintorero den Caribe Hulandes. E team exitosamente a kita e ekipo di camara for di e tribon durante e expedicion, y e tribon aki a produci resultado prometedor pa loke ta trata su actuacion den e region akí.
Tanto e transistor di satelite como e marca cu camara a demostra cu e tribonnan tintorero aki ta prefera di biaha den e area entre St. Maarten cu St. Barths; sinembargo, esakinan ta solamente e prome observacionnan. No por saca conclusion ainda pa loke ta trata movecion di e animal aki.
E informacion cu e investigacion aki ta produci lo duna un miho comprondemento di e importancia di tanto e status di tribon den awanan teritorial di Sint Maarten y den Yarari Santuario como cu e papel cu e ecosistemanan aki tin den ciclo di bida di tribon tintorero den e area mas amplio di e region Caribense.
Tribon tintorero actualmente ta cay bou di e categoria ‘Casi bou di Menasa’, di International Union for Conservation of Nature, mientras cu a cambia e categoria di tribon di rif Caribense recientemente pa ‘Den Peliger di Extincion’. Tribon ta tuma un posicion clave den mantencion di e balansa den e ecosistemanan marino local y regional; y den mantencion di biodiversidad y pa e motibo aki nan proteccion ta crucial.
Potret: © Sami Kattan/Beneath the Waves (tur derecho ta reserva)
