Ora tuma nota di loke gerencia lo a permiti, ta surgi un pregunta
*Pakico reunionnan importante di Mike de Meza mester a keda secreto?
*Mike Eman y Richard Arends mester por guia hende riba tereno legal
ORANJESTAD (AAN) — Na e momentonan aki mundo politico di Aruba ta na careda cu preparacion di listanan di candidato. Sinembargo, tin asuntonan cu mester haya atencion y DIARIO ta pendiente di e encuentro di Parlamento cu e grupo di persona, cu a investiga loke a pasa na Refineria di Aruba.
E rapport ta papia di asuntonan sumamente serio cu ta haci hende puntra nan mes, si expertonan sabi den Gabinete Eman, no tabata na haltura cu loke tabata pasa den Refineria di Aruba tabata completamente for di regla y pakico cierto asuntonan mester a keda secreto ora investigacion a start.
E asunto aki ta hopi serio pasobra Gabinete Mike Eman semper tabata mustra cu nan ta experto riba nan tereno y ora mira tabata tin varios persona den e gobierno di AVP cu titulo di hurista.
Prome Ministro Mike Eman mes tabata Notario, cu ta un persona cu mester por funda un compania. Ora mira e lista di Richard Arends, por mira cu aki ta trata di un hurista cu a sirbi como consehero di Gobierno pero tabata un consehero pa otro personanan den comunidad, cu tabata haci uzo di su negoshi pa asistencia.
E pregunta logico cu ta surgi ta, pakico nan no a mira cu loke tabata pasa na Refineria di Aruba, no tabata cuadra cu ley.
Un grupo sabi manera candidatonan di AVP riba lista di AVP a yama nan mes, mester a nota cu no ta normal pa un compania di gobierno wordo maneha cu secrecia, cu ni na momento di investigacion aparentemente mester a mira luz si tuma nota di e trabou cu e grupo di investigacion tabata tin pa haya claridad.
Segun e rapport ni sikiera a registra e miembronan di Conseho di Comisario na Camara di Comercio for di 16 di februari 2018 ora RdA a wordo funda.
E rapport a mustra cu contra e statuutnan, director Koolman como unico autoridad, no a registra Richard Arends na Camara di Comercio como Director Financiero, cu tabata tin permiso pa firma asuntonan financiero di e compania.
Tabata tin reunionnan cu no a wordo raporta den e filenan original pero cu a bin topa riba computer di Koolman.
E rapport ta papia di reunionnan di accionista caminda Koolman tabata presente. E impresion di secrecia den e compania di Pueblo di Aruba ta wordo crea seriamente den e rapport di expertonan cu actualmente ta den man di Parlamento di Aruba y riba cual Ministerio Publico mester dicidi.
Ora tuma nota di contenido di e rapport, e pregunta mas importante ta keda pakico personanan cu a presenta nan mes como hende sabi di AVP y a forma parti di Gobierno Mike Eman, no a ripara cu nan tabata viola leynan.
Si mira bon tanto Mike Eman como Richard Arends sigur mester por a conseha nan clientenan tempo nan tabata traha den nan funcion, riba e terenonan aki.
Contesta pa tur e preguntanan aki sigur mester bini dilanti proximamente den Parlamento pero tambe den e investigacion di parti di Ministerio Publico pasobra aki no por papia di falta di conocemento di materia di parti di politiconan cu den bida real mester a asisti hende riba tereno legal.
