Situacion di trafico cu cambio di careteranan ta trece ta causa preocupacion - Cambio di clima ta bira realidad den calamidad cu no tin piedad
ORANJESTAD(AAN)- Hulanda ta un pais bou nivel di awa. Un parti di Hulanda no ta trabou di naturalesa pero di hende, cu a introduci construccionnan cu mester evita inundacion.
Na Hulanda yobida ta algo di tur dia. Pero asina mes, desaster a bati na porta di Hulanda na momento cu awasero fuerte a presenta su mes na forma prolonga na Hulanda y otro paisnan cu ta registra morto y cu mester evacua su hendenan.
E situacion cu a presenta na Hulanda, ta motibo cu Arubianonan ta puntra nan mes kico lo pasa na Aruba, caminda a introduci cambionan den infrastructura sin tene realidad na consideracion.
Temporada di horcan a conoce su prome luna, cu ta Juni y awor na Juli ta na caminda pa Augustus ora sistemanan tropical aumenta den vecindario di Aruba cu tambe ta parti di Oceano Atlantico y di Caribe cu lo conoce mas sistema tropical na 2021 cu cifranan di averahe normal.
Cu Aruba semper a prepara su mes bon pa calimidad, no ta algo cu mester pone na duda. E pregunta cu hopi hende ta haci nan mes ta, kico lo pasa den e situacion nobo cu man di hende a construi pa Aruba cu conoce un red cuestionabel di cartera cu mester uni un parti di e isla cu e otro.
Ya den situacionnan normal, ciudadanonan tin problema pa haci uzo di careteranan caminda trafico ta pega. Den e construccion no a tene cuenta cu awa ta busca caminda pa lama, pero a crea situacionnan di piscina den cual trafico ta pega.
Awe Aruba ta puntra su mes kico e situacion real di Aruba lo ta, si yobidanan pisa presenta y kico e resultado lo ta pa ciudadanonan cu ta biba na luganan cu ta conecta cu caretera cu no a wordo construi cu ductonan cu por evita cu e comunidad pa tera na Aruba, den e situacionnan di mas dificil, ta posibel.
Calamidadnan cu ta presenta nan mes rond mundo, ta adverti pa loke por pasa si un ola tropical dicidi cu e ta biaha den vecindario di Aruba.
Pa resumi preocupacion di Pueblo di Aruba lo ta bon idea, pa awe autoridad competente splica Aruba kico a logra haci cu e desaster di comunicacion cu a wordo construi na Aruba cu ta atrapa den caretera cu no ta permiti ni hende, ni vehiculo, ni awa di move manera mester ta.
Pueblo di Aruba kier ricibi informacion si a logra introduci ductonan cu na principio a wordo lubida ora a construi caretera, rotonde na dozijn pa no papia mes di viaduct.
Habitantenan di barionan cu a wordo afecta pa cambio di naturalesa y durante temporada normal di yobida ya ta den problema, kier sa con leu a yega cu trabou pa ahusta e proyectonan y introduci loke ta necesario pa nan utilidad cu seguridad.
Segun ciudadanonan ta sumamente importante pa scucha awor di plannan cu mester proteha Aruba di un herencia di infrastructura, cu a costa Aruba un capital pero tambe un cantidad di problema cu sigur den temporada di yobida lo ta problema serio pa Aruba.
