ORANJESTAD (AAN): Inspeccion di Salud Aruba (IVA) a haya notificacion for di un importado di remedi cu tin un cierto produccion (batch/charge/lot) di e remedi Losartankalium, Valsartan y Irbesartan cu ta wordo saca for di mercado (recall) na boticanan na Aruba pa motibo di contaminacion cu e producto AZBT.
Inspectora di Remedi, drs. Roselynn Angela a splica cu un recall ta tuma lugar na momento cu cierto remedinan ta wordo traha, cu no ta conforme e calidad di e producto cu e mester ta segun e fabrica. Nan ta haci testnan di laboratorio y ta wak pa medio di e testnan cu tin cierto productonan tin un concentracion di mas den dje. Basa riba esaki, nan a emiti un recall. Apesar cu e cantidad ta chikito, como precaucion a dicidi di saca esaki for di mercado.
Drs. Angela a indica cu ta trata di remedinan pa baha presion halto y problemanan di curazon, cu ta wordo hopi usa na Aruba, ta trata di Losartankalium, Valsartan y Irbesartan. E remedinan aki ta obtenibel cu receta di docter na botica.
Un di e importadonan di remedi na Aruba a verifica cu tin batchnan contamina cu a wordo importa na Aruba y a tuma e accionnan necesario pa informa e boticanan debidamente. E batchnan contamina aki ta contene e producto AZBT cu por ta canceroso. Ta importante pa menciona cu e contaminacion aki ta pasa durante e proceso di produccion di remedi y no por wordo preveni.
Sinembargo, control riba calidad di remedi ta hopi rigoroso y e limite unda cu ta acepta un contaminacion ta hopi stricto. Pues, a haya un cantidad hopi chikito di e producto AZBT aki. Esaki ta nifica cu e chens cu en berdad por haya cancer door di bebe e remedinan aki (Losartankalium, Valsartan of Irbesartan) cu ta contamina ta 0.000001%, dus practicamente 0%.
Drs. Adrienne Tromp, miembro di directiva di e asociacion di boticario (VAA) a confirma cu asina cu nan a haya carta di e importador di e remedi, boticanan a kita e batchnan aki for di nan botica y ta den e proceso pa tuma contact cu e pashent cu a haya e remedi contamina pa un control y duna un remedi alternativo. E ta pidi e pashentnan pa tuma contacto cu nan docter pa cualkier otro informacion.
E botica mes lo tuma contacto cu e pashent, pero e Inspectora di Remedi, drs. Roselynn Angela ta urgi esnan cu ta uzando e remedinan Losartankalium, Valsartan y Irbesartan pa controla e charge/lot nummer riba nan paki di remedi pa wak si nan remedi ta den e lista di recall. E charge/lot nummer ta indica e batch di e remedi y por haya na banda riba e paki di remedi (mira e potret adhunto pa un ehempel). Solamente remedinan cu tin e chargenummer cu ta wordo indica riba e lista di recall, mester entrega bek na botica. E lista di recall por haya akinan. Pues, si e chargenummer riba e remedi ta cuadra cu e chargenummer cu tin riba e lista, e pashent mester tuma contacto cu su Botica.
Presidente di e asociacion di docternan di cas (HAVA), docter Joaquin van Trigt a indica cu nan tambe a wordo alerta riba e recall cu ta surgiendo na Hulanda, y di biaha a tuma contacto cu nan coleganan boticarionan pa señala cu nan tin pashentnan cu ta usa e remedinan aki.
Docter van Trigt a bisa cu ta aconsehable si pashentnan ta usa e remedinan aki pa no stop di usa nan di biaha, specialmente pa motibo cu loke nan a haya den e remedinan por causa cancer si e cantidad ta riba un cierto limite. Ora e cantidad ta bao di e limite aki, e remedi ta safe. Esaki ta un medida di precaucion.
IVA y HAVA ta compronde cu hopi pashent lo tin pregunta y/of preocupacion, pero kier pidi tur pashent cu si acaso nan tin un remedi cu ta cay bou di 2 esunnan contamina, pa no stop di bebe nan remedi tanten cu no a haya un otro remedi di Botica. E riesgo pa stop di bebe e remedi sin tin un otro remedi cu ta regula e presion ta hopi mas grave cu e risico di contaminacion. Pashentnan cu tin remedi cu NO ta cay den e lista di esunnan contamina, no mester haci nada. Si tin pregunta di e remedi semper consulta cu bo docter di cas y botica.
Inspeccion di Salud Aruba lo informa pueblo di cualkier cambio na su debido momento. E carta di e compania farmaceutico y e lista completo di e recall por haya riba e website di IVA: www.iva.aw. Ta importante pa tene na cuenta cu no tur remedi cu ta aparece riba e lista a wordo importa na Aruba tambe.
