Interesante Carousel organiza pa DAS San Nicolas hunto cu diferente instancia

Cu e meta di ta mas cerca di pueblo:

ORANJESTAD (AAN)—Diahuebs 1 di December a tuma lugar un carousel informativo titula: “Topa mi na mita Carousel” na e parti pafo di Departamento di Asunto Social, San Nicolas, organiza pa DAS su Seccion Guia Social y Centro pa Hoben y Famia, en colaboracion cu mas di 15 instancia.

DIARIO a papia cu Nathalie ken a organiza e evento hunto cu su colega Margareta y el a bisa cu Departamento di Asunto Social ta traha pa e famia di Aruba y e meta di e Carousel y tur loke semper nan ta haci, ta pa yega mas cerca di nos pueblo.

Nan kier pa laga pueblo sa cu nan tey pa nan, cu tin yudanza pero nan tin cu bati na porta y sostene DAS cu e yudanza cu nan tin pa brinda. Hunto cu e clientenan DAS por logra haci un diferencia pa e problemanan cu tin riba nos Isla. “Mi mester bisa cu nos no por papia di problema so, pasobra nos tin famianan y hobennan cu ta den deporte, cu ta siña bon na scol,

y ta haci nan best bon, pero tambe tin e gruponan cu mester di nos atencion, y nos tey pa stimula nan haci di nan parti tambe, manera tur e otro muchanan cu ta bezig eyfo y cu ta briya, pa nan briya tambe, anto nos ta akiden pa yuda sostene nan. El a indica cu tin hende cu hopi biaha pa berguenza no ta bin busca ayudo, of no sa mes cu DAS ta existi.

Pesey nos a organiza carousel cu otro instancianan cu dia aden dia afo, ta traha duro, entre otro Voogdijraad, cu ta yuda famianan pa nan sigui dilanti cu nan yiunan, Wit Gele Kruis, Fundacion Respeta Mi, FADA, Hunto, Fundacion Guia Mi, Reclassering, cu nos ta traha pa yuda nos pa bay dilanti”, Nathalie a relata.

DIARIO a entrevista varios di e diferente instancianan presente y den transcurso di e siguiente dianan, lo trece dilanti mas informacion.