Ady Thijsen a haya un bunita recepcion di introduccion como Minister Plenipotenciario

ORANJESTAD (AAN)/Den Haag  – Na Marriott hotel a tuma lugar un recepcion di Gobierno di Aruba pa oficialmente introduci mr. Juan (Ady) Thijsen como Minister Plenipotenciario di Aruba na Hulanda.

Un recepcion bon atendi pa invitadonan for di e mundo poltitico, diplomatico y comerciante di Hulanda. Entre e invitadonan cu personalmente a bin felicita sr. Thijsen cu su nombracion tabata Minister di Enseñansa di Hulanda Robbert Dijkgraaf, Prome Minister di St. Maarten Silveria Jacobs, Minister Plenipotenciario di St. Maarten Rene Violenus, miembronan di Tweede Kamer Jan Klink y Jorien Wuite, miembro di Eerste Kamer Toine Beukering.

For di cuerpo diplomatico tabata presente embahador di Merca Razdan Duggal, di Urugauy Álvaro Enrique González Otero, di Surnam Rajendre Khargi, di Ecuador Andres Horacio Teran Parral, di Panama Elizabeth Ward Neiman, di Filipinas mr. Jose Eduardo III Malaya, di Kazachstan Askar Zhumagaliyev. Otro embahadanan manera Peru, Brazil, Suecia, Suisa y Sur Afrika a keda representa pa un embahador suplente.

            Tambe e recepcion a conta cu presencia di presidente di MKB Nederland Jacco Vonhoff, prof Gerhard Hoogers di Universidad di Groningen, functionarionan di Hogescholen, ministerio di BZK, Curaçaohuis, St. Maartenhuis, organisacionnan manera Splika y Genootschap Nederland Aruba.

            E parti oficial a cuminsa cu un discurso di Prome Minister mr. Evelyn Wever-Croes como introduccion di sr. Ady Thijsen como Minister Plenopotenciario. Sra. Wever -Croes a para keto na e recuperacion di Aruba despues di e pandemia. ‘Aruba ta un di e paisnan den Caribe cu a recupera hopi liher di e pandemia. Turismo na ta un nivel di 97 porciento compara cu prome cu e pandemia y e porcentahe aki tambe ta conta pa nos GDP. Meta ta pa yega otro aña na un surplus di e nivel prome cu e pandemia,’ segun Prome Minister Wever-Croes.

            E mandatario a sigui bisa cu e prioridad pa e siguiente añanan ta diversifica economia di Aruba, atencion pa adaptacion di clima y transicion di energia. Tambe lo bin cu inversionnan entre otro den enseñansa y salubridad publico. Prome Minister Wever-Croes a bisa di ta contento cu sr. Ady Thijsen a acepta e encargo di Minister Plenipotenciario y alabez Representante di Aruba na Union Europeo y cu e ta convenci cu Sr. Ady Thijsen lo ta un digno representante di Aruba cu lo traha na fortifica e lasonan den Reino, cu Hulanda y cu e comunidad Arubiano na Hulanda.

            Despues di un video di introduccion a yega e momento pa sr. Ady Thijsen mes tene su discurso na e invitadonan. Ela cuminsa na describi su lasonan cu Arubahuis desde cu e tabata studiante na Tilburg y como presidente di CUNA. Como miembro di Staten y despues Presidente di Staten e tabata hopi na Hulanda pa reunionnan di IPKO y asina a reanuda su contactonan cu Arubahuis. Minister Thijsen a bisa cu su vision pa proximo añanan ta pa haci Aruba mas visibel na Hulanda. ‘Den esaki Arubahuis ta hunga un rol cardinal. Nos mester fortifica nos relacion cu Gobierno di Reino. Gobierno di Hulanda, ministerionan, Eerste y Tweede Kamer, pero tambe cu gemeente y provincianan. Ta importante pa intensiva nos relacion cu institutonan manera Raad van State, Controleria General, Nationale Ombudsman y SER, mescos cu ta e caso cu instancianan manera VNG, OCAN, VNO/NCW, MKB Nederland y RVO pa loke ta e parti commercial. Cu embahadanan lo mester mira unda por bin cooperacion pa desaroyonan economico pa Aruba,’ asina minister Thijsen a bisa.

            E mandatario a menciona cu ela retene e funcion di representante di Aruba na Union Europeo banda di esun di Minister Plenipotenciario. ‘Pa logra nos metanan pa cu Union Europeo ta sumamente importante nos miembrecia di OCAN (Overseas Countries and Territories Association). Ultimo mi a atende un foro di OCAN na New Caledonian na unda bo ta mira cu aunke e islanan den Caribe y esnan den Pacifico, geograficamente ta hopi leu for di otro, pero cu nos por traha hunto riba terenonan mutuo, manera cambio di clima, biodiversidad y seguridad di alimentacion.’

            Sr. Thijsen a bisa cu e guera Oekraina a mustra cu nos mester di otro y cu mester sostene otro. ‘Mas cu nunca tin nesecidad na un Reino basa riba union. Nos mester duna mas contenido na unidad, solidaridad, igualdad, husto, responsabilidad y integridad den Reino Hulandes. Pesey semper mi ta di opinion cu articulo 43 lid 1 di Statuut ta e lid mas importante. Si nos como pais den Reino zorg cu derechonan humano fundamental, libertad, derecho di ley y bon gobernacion ta wordo realisa, semper cos lo bai bon,’ segun sr. Thijsen.            Den su discurso minister Thijsen a para keto na e ley riba e geschillenregeling cu desde 12 aña pasa cu e amienda Wever/Thijsen a keda acepta pa un mayoria grandi den Tweede Kamer, ainda nada a pasa riba e tereno aki. Thijsen: ‘E amienda aki ta bisa cu articulo 12a di Statuut lo mester wordo cambia unda ta stipula cu mester crea facilidadnan den caso cu tin un disputo. Na 2015 e mocion Van Laar a wordo acepta pa Tweede Kamer cu ta bisa hopi cla cu mester bin un “rijkswet geschillenregeling” cu ta stipula pa bin cu un instancia independiente cu ta duna conseho obligatorio den caso di un disputa huridico. Awor aki a yega e momento pa nos bin cu un “rijkswet geschillenregeling”. Tambe mi ta boga pa bin un Conferencia di Mesa Rondo di Reino pa trata diferente asunto y interes mutuo cu ta existi entre e paisnan den Reino.’

            ‘Mi ta un gran simpatisante di un Reino fuerte, unda no unicamente ta traha y biba hunto, pero principalmente conhunto carga e responsabilidad y tuma desicionnan conhuntamente. Pesey mi tin tur confiansa den nos Prome Minister Evelyn Wever-Croes y Secretario di Estado pa Asuntonan di Reino Alexandra van Huffelen, cu tin e interes di e islanan na pecho. Tambe e ta habri pa duna espacio pa yega na consensus, con complica e problema por ta,’ segun minister Thijsen.

            Na final Minister Thijsen a bisa di ta convenci den e capacidad di e team di Arubahuis pa realisa e vision y plannan cu e tin como Minister Plenipotenciario. Tambe sr. Thijsen a gradici su famia cu ta e fundeshi pa e por ehecuta su function na Hulanda. 

E potretnan ta cortesia di Arubahuis. Fotografo Nico van der Ven.