DIARIO prome cu pandemia a prepara Aruba pa realidad nobo
- Estudio, trabou y empresa enfrente e reto grandi pa hende
- Gremionan mester prepara comunidad pa e reto di 2023
ORANJESTAD (AAN)- Na final di 2019, DIARIO a presenta na su lectornan un produccion internacional cu den tempo cortico a haya atencion mundial.
“E Era di Inteligencia Artificial”tabata titulo di e presentacion riba e lugar cu uso di sistemanan computerisa lo ocupa den nos mundo moderno.
E sensacion causa pa e topico, mundialmente a deshaci di su importacia cu no ta haya e lugar den rapportnan importante y e planificacion den tur sector.
Si na final di 2019 mundo a wordo confronta cu e realidad di inteligencia artificial, na 2020 mundo a haya sosten di inteligencia artificial pa e por confronta e pandemia di Covid-19 cu a confronta e resistencia di informacion cu hende a acumula y cu techonologia a yuda hende uza pa enfrenta e peliger grandi di e pandemia.
Diariamente hende ta haci uzo di loke ta cay bou e categoria di Inteligencia Artificial cu na 2023 ta alcansa segun cientificonan su punto culminante.
Kico ta Inteligencia Artificial y pakico e ta sirbi interes di hende pero tambe ta un peliger grandi pa hende?
E pregunta ta simpel.
Inteligencia Artificial ta e produccion di inteligencia humano cu ta uza informacionnan importante cu hende ta acumula cu asistencia di programanan special.
Pa un hende lo ta sumamente dificil pa uza pen y papel pa acumula tur e informacionnan cu por ehempel a drenta, ora mundo a bati alarma pa Covid-19. Sinembargo, programanan di computer si por a pone tur e informacionnan aki hunto pa mundo por a haya un bista riba e progreso di e pandemia y actua tambe.
Informacion cu hende ta entrega na programa di computer, ta bira e base di Inteligencia Artificial cu ta capaz pa atende cu informacionnan cu hende ta prepara, na un forma mas rapido cu hende mes.
Den e documento “E Era di Inteligencia Artificial”a bini dilanti e pregunta si Inteligencia Artificial ta menasa hende y trabou cu ta base di entrada di hende.
Awe e preguntanan ta haya contesta cu ta splica con Inteligencia Artificial ta na beneficio di hende pero na mes momento ta bira e peliger grandi pa empleo ya cu por programa trabou cu awor mester di cantidad di personal pa traha.
DIARIO hunto cu expertonan ta tuma nota di un cantidad creciente di documentacion cu sigur mester haya atencion mas extenso di mundo empresarial pero tambe di parti di sindicatonan.
Rapportnan cu a mira luz na 2023 ta mustra riba aspectonan sumamente importante manera e cantidad di hobennan cu ta wordo prepara pa trabou como profesionalnan nobo cu mester encarga nan mes cu e proceso nobo di Inteligencia Artificial cu ta un asunto di tur sector.
Expertonan riba e tereno mester yuda den programanan cu ta wordo desaroya pa e comunidad pero tambe pa empresanan cu mester brinda labor y sindicatonan cu mester cuminsa atende cu publico, con por ehempel trahadornan por haya asistencia pa nan por eleva nan mes den e cambionan cu ta exigi mas training.
Cuanto placa ta envolvi den e cambionan cu por spera y con lo bay financia e peso cu e avance di Inteligencia Artificial ta nifica?
Awor tur informacion general cu DIARIO por a copila ta indica cu no tin e interes ni accion necesario pa e progreso di Inteligencia Artificial cu na 2023 ya ta e realidad grandi di necesidad basico.
Con ta prepara sigur hobennan pa un carera den cual nan continuamente no solamente ta haya un entrada como trahador pero ta sigui upgrade nan mes?
Cu entrada di un siman nobo, DIARIO manera a priminti ta traha riba e necesidadnan nobo pa futuro cu mester wordo cubri dor di hubentud y muchanan cu awor ta studiante of ainda mester bira studiante.
Inteligencia Artificial ta uno di e factornan cu mester ta mas na discusion no solamente pa e oportunidadnan cu e ta brinda pero tambe pa su peliger.
Con ta proteha hende di bira victima di sistemanan cu por produci loke hende no por produci?
Leynan nobo lo mester wordo introduci dor di Parlamento cu tin tareanan nobo pa atende.
Mas publicidad mester wordo duna na Inteligencia Artificial cu lo mishi cu labor, cu empresa, cu sistemanan educacional, loke ta nifica cu educacion lo mester wordo adapta.
Na e momentonan aki mundo digital a bira parti di bida di hende, cu sinembargo, mas tanto ta uza e loke e ta kere cu ta beneficio di e Era di Inteligencia Artificial y hasta ta afecta por ehempel e labor responsabel di personanan cualifica pa medio di personanan cu ta uza informacionnan cu nan no ta comprende pero cu cual nan ta competi cu expertonan riba nan tereno.
DIARIO hunto cu expertonan ta sigui informa Aruba!
