DEN HELDER: Durante un caso violento di tiramento cu a socede den e anochi di Diabierna pa Diasabra na Den Helder, Hulanda, un homber a ser mata, y dos otro a resulta herida.
Uno di nan ta den situacion critico, mientras e otro ta levemente herida.
Tabata net un tiki despues di mey anochi, cu testigonan a nota cu tiro a cuminza cay den e area druk cerca di e Café De Bierbron. E tiramento a socede na cruzada di Brouwerstraat y Bassingracht.
Den e tiramento, un di e victimanan di fam Martis di apenas 25 aña di edad a haya bala den su garganta, y a fayece un rato despues na Hopsital. Un otro victima a haya bala den barica, y su situacion ta critico. E di tercer victima, riba su mes a bay Hospital pa yudanza medico.
E asesino mes a logra bay despues di a basha bala.
Ora cu Polis a yega na e lugar, a core busca mas Ambulans. Como cu e dosnan herida pa impacto di bala tabata hopi grave, a busca dos Helicopter tambe pa yuda den e transporte di nan pa Hospital.
Polis a ripara cu un auto eynan tambe a haya hopi impacto di bala, y e caminda a wordo seya pa asina un Team Forensico di Recherche por investiga esey.
Polis a indica cu nan tin indicacion caba ta kende a tira eynan, como cu e ta un ‘conocido di Polis’ y ta marca como un individuo hopi peligroso.
