Gavril Mansur, Presidente nobo di KvK:
ORANJESTAD (AAN) — DIARIO a entrevista señor Gavril Mansur, Presidente nobo di Camara di Comercio y Industria di Aruba (KvK).
El a cuminza bisando cu KvK semper ta hunga un rol importante na Aruba, y semper a haci esey. Cada presidente tin un sabor di su mes, por tin cambionan, pero e aspecto mas importante pa Mansur ta cu Camara di Comercio ta keda haci loke e tin cu haci; esta, sirbi como un “sounding board”, percura pa duna e trainingnan necesario, representa e comerciantenan debidamente, y naturalmente keda tambe como un “tussenpersoon”, hopi biaha, entre e comunidad comercial di Aruba, gobierno, y otro instancianan. Esaki ta un di e partinan importante cu KvK ta haci.
“Y ami, como presidente nobo, tin e suerte cu tabata tin hopi presidente prome cu mi, cu a haci un tremendo trabao. Pues, na prome lugar kico mi ta bay haci, ta sigui cu e bon trabao”, Gavril Mansur a señala.
El a subraya cu e no ta kere den yega un caminda cambia tur cos si no tin mester di cambio. “Pero, naturalmente, manera mi ta bisa, cu hende nobo ta bin cos nobo. Mi a caba di cuminza, nos ta bay wak ki cambionan lo por tin”, Mansur a indica.
El a agrega cu KvK ta scucha hopi di su miembronan, y hopi di e preocupacionnan ta mesun cos cu tur hende ta papia di dje: inflacion! “Inflacion ta pone cu tur cos ta carisimo awendia. Aruba siendo un Isla chikito bo ta importa tur cos y di antemano, eigenlijk, nos tin un percepcion cu nos ta caro. Semper nos tabata caro y aworaki cu e inflacion cu nos ta importando cosnan ta mas caro ainda”, Gavril Mansur a reitera.
