Un pregunta cu no ta haya atencion ora papia di realidad
*Un Pueblo cu salario di Seis Dollar y Aruba cu sueldo minimo
*Wega ta caba dia splica Nicolas cu tin mas pais cu petroleo
ORANJESTAD(AAN)—Den un mundo cu ta zink den crisis financiero y economico, e apertura di frontera cu Venezuela ta wordo considera como un bendicion di cielo.
Naturalmente e ta un bendicion pa tur e famianan y hendenan cu a keda separa di nan pais of di familiares cu no por bishita otro.
Pero tabata tin un motibo cu awe e Venezolano ta e parti mas perhudica den henter e desaroyo Latino Americano, caminda ta papia di petroleo y di wega di un homber yama Nicolas Maduro, cu ta un manipulador y a hinca un pais den un desaster mucho mas grandi cu hende lo pensa.
Kico ta pasa ora habri frontera di Venezuela, caminda hende ta gana un salario di Seis Dollar pa luna y ta muri pa un Ice Cream di 2 Dollar?
Kico e moneda di Venezuela ta nifica na e pais? Nada.
Na e momentonan aki tur realidad cu mester tene na consideracion ta perde for di bista pa cuminsa cu e seguridad di cada ciudadano Arubano, cu mester tene na bista ora e drenta un pais di fantasia mundial.
Mester usa e palabranan aki cu e salida di Juan Guaido a pinta na mundo.
Juan Guaido supuestamente tabata e Presidente electo pero nunca e por a tuma un decision.
El a wordo baha dor di politiconan cu kier dicidi riba Venezuela, pero cu ta leu for di Venezuela y dor di a keda den exterior a evita cu awe nan ta muri of ta mitar morto den prison di Nicolas Maduro.
Ta bira tempo pa hende habri nan wowo.
Na e momentonan aki Nicolas Maduro ta basa tur su decisionnan riba placa cu e kier haya di exterior pa asina e por evita cu e ta na careda ora Venezolanonan fada y dicidi cu ta basta.
Petroleo a haci Nicolas Maduro poderoso na un mundo cu ta laga hende hunga cu nan interes.
Cuanto pais tin petroleo?
Pa yega na solucionnan mester ta realistico.
Si e opcion pa habri frontera cu Venezuela ta real y ta bon, pakico no ta habri e frontera awor? Kende a cera e frontera? Pakico e frontera a cera?
Venezuela ta un caos enorme. Un caos cu cualkier momento por explota pasobra no tin nada mas peligroso cu un pueblo desespera cu e Venezolano ta!
Con un Pueblo por dicidi na eleccion pa cambio si e opositornan di Maduro mester keda den exterior hasta durante eleccion?
E realidad di Venezuela ta sumamente tristo. Mas ainda pasobra mundo liber ta biba di fantasia y politiconan na paisnan liber mester stop di busca voto solamente y mira realidad.
E moneda Venezolano ta bisa tur cos. E moneda Bolivar cu Nicolas Maduro a mata, a sufri un record di inflacion.
Awe cu cabez frio mester atende cu Maduro, cu solamente tin un problema. Ki dia placa ta caba?
