Manera DIARIO a pronostica petroleo atrobe na caminda pa $80 Dollar
*Posision pesimista di IMF na inicio di 2023 no a bira realidad
*Mercado turistico di Aruba, Merca, pais cu mas a resisti problema
ORANJESTAD(AAN)—Hunto cu medionan di comunicacion rond mundo, DIARIO a keda en espera di e momento cu Fondo Monetario International lo duna e prome indicacion kico por spera na 2024 di economia mundial.
Manera DIARIO a informa su lectornan continuamente y ayera a keda confirma atrobe durante e entrega di informacionnan na prensa mundial, Fondo Monetario Internacional a mustra cu su proyeccionnan pesimista pa economia na 2023, no a bira realidad.
E Fondo Monetario Internacional cu ta central den atencion na inicio di aña, ta e instancia cu ta entrega na mundo cifranan concreto y proyeccionnan pa paisnan na inicio di aña, durante cual ta sigui vigila desaroyonan y haci proyeccion di nan resultadonan den rapportnan cu ta guia financiero y economico na mundo.
IMF, cu pa loke ta trata Aruba den su rapport ya a duna informacionnan sumamente alentador pa Aruba te na 2028, a tene un ante sala di e momento cu oficialmente e proyeccion pa 2024 lo wordo duna.
Segun por a comprende for di su palabranan, mundo a sobrevivi e sucesonan cu tabata amenasa bienestar mundial na 2023.
Mundo tabata mas fuerte cu e Fondo Monetario Internacional mes a pensa, aunke mester sigui presta tur atencion na e sucesonan actual rond mundo, cu no a mehora pero ta keda motibo pa preocupacion serio.
Sinembargo, e prome resultadonan cu ayera a wordo presenta na mundo pa 2023, ta mas alentador cu e proyeccionnan cu a wordo haci.
E anuncio aki a wordo haci riba un dia di suspenso cu a dal un vuelta radical tambe ora prijsnan di petroleo a cuminsa subi y mundo a bolbe cuminsa puntra su mes con halto e prijsnan lo subi.
E sucesonan aki tabata completamente di acuerdo cu e informacion cu DIARIO a duna na su lectornan na momento cu prijs di petroleo tabata cay durante ultimo dianan.
Loke sigur awor lo bira discusion grandi ta e informacionnan cu lo wordo duna dor di Fondo Monetario Internacional, cu a presenta na foro mundial e resultadonan sumamente importante pa Aruba, cu ta sconde den e hecho cu Merca, cu ta e mercado turistico mas importante di Aruba, a bira e pais cu a resisti mihor e problemanan serio cu mundo a conoce.
Esaki pa Aruba, cu ta depende economicamente di e bienestar di e ciudadano Americano cu ta forma e mercado turistico principal di Aruba, ta un informacion sumamente alentador.
E informacion aki ta mas importante si tene na consideracion e impacto cu condicionnan di Merca tin riba Aruba a base di e relacionnan comercial entre e dos paisnan y e importante cu Merca tin den importacion pa Aruba tambe.
Oficialmente e pronosticonan nobo di IMF lo wordo presenta na fin di Januari den e rapport cu lo duna tur detaye riba e forma cu mundo a sobrebibi pandemia, crisis di petroleo y guera na Ukraine na 2023.
Importante ta keda sinembargo, vigilancia di e situacion na Medio Oriente, cu manera DIARIO a splica a bira un reto nobo pa e mundo di cambio den cual azeta lo hunga e papel central.
Manera pues DIARIO a pronostica, e prijs di petroleo despues di caida historico, a subi ayera y na ciere di e edicion aki tabata na caminda pa pasa 80 Dollar pa baril atrobe.
DIARIO ta pendiente di tur informacion cu ta drenta di rond mundo, cu manera IMF mes a mustra tabata mas fuerte cu a wordo pensa pero awor mester para fuerte den situacionnan nobo cu ta surgi y ta contene peligro tambe pa economia mundial, manera DIARIO a adverti.
Mientrastanto por spera cu e reunion di staff di Fondo Monetario Internacional den e proximo dianan aki lo informa tambe riba su Nota di discusion entorno Inteligencia Artificial y Labor, cu ta un tema na cual DIARIO na 2023 a duna hopi atencion en preparacion pa e impacto cu e lo tin pa comunidad y futuro.
