*nan intencion ta pa tuma e festival over cuminsando na 2025
ORANJESTAD(AAN): Diahuebs a tuma lugar un conferencia di prensa na Jungle Café, unda cu representantenan di 5 banda musical a duna di conoce cu nan lo no participa na Festival di Tumba di 2024.
Ta trata di D’Liciuos (DLS), Buleria, One of A Kind (OAK), SUONA y Shine Music.
Esaki 1 dia despues di inscripcion pa e festival y un tiki mas cu 1 siman prome cu e festival mester tuma lugar.
Pa cuminsa Nicole Martina a indica cu un carta a wordo manda pa SMAC den nomber di e 5 agrupacionnan musical, pa duna di conoce cu nan lo no participa na e festival.
Den e carta a wordo splica entre otro cu un di e motibonan cu e bandanan a tuma e decision ta falta di comunicacion.
“Na diferente occasion desde Maart 2023 a pidi pa reuni cu tur tumbero pa por concretiza puntonan importante pa por engrandece e festival y a haya un reunion riba 22 di November di 2023, unda cu a papia entre otro riba participacion huradonan di exterior y tumberonan di exterior, como tambe riba adaptacion di regla, produccion, premio ingeniero di sonido y pa agrega e categoria di tuma loco”.
Te cu awe no a ricibi e notulen, segun Martina.
El a sigui bisa cu a aumenta e premionan, pero ta e musiconan mes mester a bay busca e informacion pa haya sa esaki.
Un di e puntonan cu e musiconan ta bisa di tin un problema grandi cune ta falta di promocion di e festival.
E musiconan ta critica entre otro e hecho cu ta te 14 di Januari e prome flyers di promocion pa e evento por sali.
Nan ta haya cu mester permiti pa promove e festival mas trempan y cu mester haci un mihor promocion.
E bandanan a expresa di tin e intencion di tuma over e Festival di Tumba pa 2025 y ta dispuesto pa haci esaki tambe pa e Tumberito.
“Nos vision pa 2025 ta pa e genero di Tumba wordo inclui y reconoci den e temporada di Carnaval y pa e calidad di e festival wordo eleva”.
Tambe e festival mester wordo produci y dirigi door di un organizacion dedica.
E organizacion mester consisti di musiconan cu conocimento di e genero y e mester ta un organizacion cu experiencia di organiza eventonan di e magnitud aki, segun e carta.
“Ta lamentable cu mester a tuma un decision di e extremo aki, mirando cu nos tin e Festival di Tumba na curazon”.
Nos ta desea di haya un reunion cu presidente di SMAC pa presenta nos proposicion pa Festival di Tumba 2025, e carta a finaliza.
