Pa Aruba IMF premira pa 2024 un inflacion di 2.3 porciento
ORANJESTAD (AAN): Diahuebs 11 di januari 2024 durante un Openbare Bijeenkomst Minister Geoffrey Wever hunto cu Departamento di Asuntonan Economico, Comercio y Industria a duna Parlamento di Aruba un update di e Economic Outlook 2023-2024.
Den e publicacion riba proyeccion economico Departamento di Asuntonan Economico, Comercio y Industria ta presenta tambe e expectativa pa e nivel di prijsnan na Aruba.
Den e Economic Outlook di juni 2023 Departamento di Asuntonan Economico, Comercio y Industria a premira inflacion di 4.4 porciento den 2023 y 3.2 porciento pa 2024.
Segun e December Economic Outlook 2023- 2024 Departamento di Asuntonan Economico, Comercio y Industria ta premira cu inflacion den 2023 lo tabata 3.6 y ta premira pa 2024 un inflacion di 3.5 porciento.
E calculacionnan pa inflacion ta basa riba e ultimo informacion disponibel. E nivel di prijs premira na Aruba ta den liña cu calculacionnan di International Monetary Fund pa no solamente Aruba pero tambe pa dos partner comercial grandi Merca y Hulanda.
International Monetary Fund den su World Economic Outlook di Oktober 2023 ta premira un inflacion na Merca di 4.1 porciento den 2023 y pa 2024 2.8 porciento. Den 2022 segun International Monetary Fund Merca a conoce un inflacion di 8.0 porciento.
Pa loke ta trata Hulanda, International Monetary Fund ta premira un inflacion di 4.0 porciento den 2023 y pa 2024 4.2 porciento. Hulanda a conoce un inflacion di 11.6 porciento den 2022.
Pa Aruba International Monetary Fund ta premira pa 2023 un inflacion di 4.5 porciento y pa 2024 un inflacion di 2.3 porciento. Den 2022 inflacion tabata 5.5 porciento na Aruba segun Centraal Bureau voor de Statistiek.
Por deduci cu pa 2024 proyeccion di inflacion na Aruba ta sigui e desaroyo internacional: pa 2024 ta premira un nivel di prijs relativamente mas abao cu 2022, un aña cu economia mundial a experiencia inflacion bastante halto.
Ministerio di Asuntonan Economico, Comunicacion y Desaroyo Sostenibel conhuntamente cu Departamento di Asuntonan Economico, Comercio y Industria lo sigui monitor e nivel di prijs na Aruba y desaroyonan internacional.
Minister Geoffrey Wever kier gradici directora Maria Dijkhoff- Pita y e afdeling Economisch Beleid en Onderzoek cu ta haci e economic outlook y calculacionnan di inflacion posibel.
E publicacion completo ta disponibel riba e website www.deaci.aw.
