ORANJESTAD (AAN): Organizacion Mundial di Salud (WHO) a defini pa prome biaha como un malesa, loke ta conoci como COVID persistente, pos COVID-19 of long COVID, cu e obhetivo di facilita tratamento di pashentnan.
E docter Janet Diaz, hefe di maneho clinico di WHO a splica den un presentacion na Ginebra, Suiza, cu ta trata di un patologia cu ta presenta “normalmente tres luna despues di inicio di COVID-19″. “E sintomanan ta dura por lo menos dos luna y no por wordo splica door di diagnostico alternativo”, el a bisa. E definicion di un malesa nobo a tuma lugar despues di un consulta riba nivel mundial.
Gran parti di pashentnan cu ta sufri di COVID-19 ta recupera completamente, aunke algun ta sufri “efectonan a largo plazo den su curpa, den sistemanan pulmonar, cardiovascular y nervioso, como tambe efectonan psicologico”, e experto a agrega. E efectonan por aparece independientemente di gravedad inicial di e infeccion y ta tuma lugar cu mas frecuencia den hende muher, personanan di edad medio y esnan cu a mustra mas sintomanan inicialmente.
E buskeda di un definicion di WHO ta busca duna claridad na profesionalnan di salud relaciona cu e malesa nobo cu ta complicando esfuerzonan pa avanza den investigacionnan y tratamentonan.
Diaz a subraya, durante e presentacion cu el a haci den sede na Nacionnan Uni na Ginebra, cu sintomanan di pos-COVID ta inclui “fatiga, dificultad pa hala rosea, disfuncion cognitivo, pero tambe otronan cu generalmente repercuti den funcionamento cotidiano”.
“E sintomanan por ta nobo, despues di recuperacion inicial di un episodio agudo; of por persisti desde inicio di e malesa. Ademas, e sintomanan tambe por fluctua of por tin recaida cu tempo”, el a indica.
Un revision di estudionan cientifico realiza na Merca a identifica cu tin 55 efecto a largo plazo cu por aparece despues di desaroya e malesa COVID-19, entre esnan cu a wordo describi pa Diaz.
Diaz a considera cu e definicion nobo ta implica un “un importante paso padilanti” pa standariza reconocimento di pashentnan cu e condicion. WHO ta spera cu “por yuda personal medico y sanitario pa reconoce pashentnan y cuminsa tratamento y intervencionnan adecua y por sa e caminda cu nan mester tuma”, el a agrega. “Nos ta spera cu responsablenan politico y sistemanan sanitario establece y aplica modelonan sanitario integra pa atende e pashentnan aki”, el a manifesta.
Mientras ta existi testnan pa detecta e infeccion inicial di COVID-19, no tin ningun pa detecta e malesa posterior, y ainda no ta claro kico ta desencadena y di con algun persona ta sufri di dje y otronan no.
