Hopi Venezolano a presenta na Consulado di Venezuela pa eherce nan derecho sagrado di voto

ORANJESTAD (AAN) Diadomingo 28 di Juli 2024, ta un fecha cu ta marca historia pa e Republica Bolivariana di Venezuela,

su pueblo y tur compatriota cu derecho di voto y cu a bay biba den exterior y cu a acerca nan respectivo Consulado of Embahada, pa emiti nan voto.

Esaki ta wordo considera como e di mas grandi desafio electoral pa Venezuela, durante e ultimo cuartal di siglo. Mientras cu President Nicolas Maduro a busca un di tres mandato despues di 11 aña den e poder, su oponente y principal rival Dr. Edmundo Gonzalez, ex diplomatico a yega deposita su voto hunto cu su señora, acompaña por un bon parti di oposicion, cu despues di a supera cierto diferencianan a respalda Gonzalez su candidatura.

Gonzalez den su combersacion cu algun medio di prensa Diadomingo mainta, a señala como prome meta haci tur su esfuerzo pa e Venezolanonan cu a imigra rond mundo regresa nan pais, y duna nan e trankilidad cu un pais democratico, liber di corupcion, cu husticia social, y pleno di libertad, lo ofrece y brinda nan.

Miles di Venezolano toch a topa cu obstaculonan den hopi di e consuladonan den exterior y a keda sin emiti nan sagrado derecho di voto. Aki na Aruba, ta mustra cu tur cos a bay trankil y riba combinacion di potret por aprecia algun imagen di e momento cu a proceso electoral a cuminza Diadomingo for di trempan.