Con por uni mundo si ta trapa riba libertad di religion di otro?
- Na Weganan Olimpico hende a transforma su mes den lobo pa hende
- Covid-19 a logra uni hende mas cu henter e show Olimpico na Paris
ORANJESTAD (AAN) Na momento cu atletanan di tur parti di mundo a reuni na Paris, ta pa den un mundo caminda hende a bira e peor enemigo di hende, trata na trece paz cu ta base di bienestar di hende.
E forma cu Comete Olimpico Mundial ta hustifica loke a pasa sin ningun motibo contra esnan cu no solamente cu boca a practica fe Cristian, no tin palabra.
Loke a pasa durante Weganan Olimpico na Paris, ta prueba cu e capital di Francia no ta e dia di victoria di genero humano ta wordo celebra, pero e dia di decadencia mundial cu ta manifesta su mes na prome lugar den e hecho cu hende no ta hende pa otro.
Mas bien na Paris a keda demostra, cu “homo homini lupus est” hende ta lobo pa hende te dia di awe, loke ta motibo cu e adelantonan cientifico di mundo no ta sirbi bienestar di e hende pero mas bien ta habri caminda pa hende por ataca y destrui otro mihor.
No por tin ningun noticia mas importante pa e genero humano, cu ta loke a pasa na Francia caminda pa hende por hiba nan lucha, nan ta abusa directamente di otro y trata di deshaci di tur respet cu hende mester tin pa otro.
Ta tristo cu den un mundo cu ta gasta tanto placa pa bay Wega Olimpico, caminda hende mester uni cu hende di tur parti y di tur creencia na mundo, e esencia di fe Cristian ta wordo directamente ofendi.
Kico ta pasa na e mundo aki? Nos ta papia di democracia y cantidad di situacionnan mariviyoso di cual nos personalmente kier probecha pero cu pa nos no tin ningun balor pasobra si nos mester destrui hende pa alcansa loke nos kier, nos ta hacie.
Prueba di loke ta wordo skirbi awe den e analisis aki, ta e hecho, cu for di basta tempo mundo conoce un situacion di guera mundial, cu hende riba tur tereno na guera cu otro.
E unico momento cu mundo a conoce union, ta ora Covid-19 a bati na porta, a amenaza tur hende cu morto y miedo pa muri a haci cu diripiente tur hende y tur pais kier a uni.
Con por celebra Weganan Olimpico cu a wordo introduci na mundo atrobe pa uni mundo, si ta trapa riba loke ta sagrado pa otro?
Con mundo por uni den tolerancia, si religion cu ta base di bida di personanan cu realmente ta sostene nan religion, ta bira bofon abierto na Weganan Olimpico?
Decadencia humano ta encera, cu e ser humano ta perde balor den e interaccion humano cu ta haci hende enemigo di otro.
Decadencia ta presenta den ofensa di otro, den abuso, den crueldad enfrente otro pa asina alcansa propositonan individual.
Den un mundo cu kier papia di igualdad, respet di tur pa otro mester garantisa. Si ta papia di igualdad di hende, no por discrimina y insulta otro manera a pasa na
Weganan Olimpico di Paris, caminda a ofende e alma religioso di tanto hende na mundo.
Mundo ta pasa den uno di su peor momentonan. Nos por a haya tur tipo di conocemento, di adelanto material y mucho mas. Pero e forma con ta abusa di otro, ta ataca otro pa alcansa propositonan personal, no por wordo hustifica.
Durante ultimo dianan na Paris, Weganan Olimpico a perde tur su balor y mundo a conoce e decadencia di mas grandi cu ta organisacion di un evento mundial pa tur hende bira ruman supuestamente, pero permiti pa e ocasion aki mishi cu e balor di religion.
Palabra a caba na Paris, cu a base su mes entorno di e Revolucion Frances cu a deshaci di un cas Real pa introduci Napoleon, pa asina pone un Emperador na mando.
Pakico mester a uza e tema politico na wega Olimpico ta keda un pregunta grandi. Pero tristo ta keda cu Weganan Olimpico a bira e momento cu a trapa riba religion na e forma cu no a laga ningun lugar na duda cu Weganan Olimpico no ta buskeda di paz y union y asina bienestar di hende, pero a bira ocasion pa duna prueba di e decadencia mas grandi di hende, cu ta e momento cu hende ta bira lobo pa hende!
