Tienda di Educacion: Aña escolar 2021-2022 a start sali y nos muchanan por a disfruta di un vacacion bon mereci.
Manera nos tur sa, e aña tras di lomba tabata tin hopi reto pa nos muchanan, maestronan pero tambe pa mayornan. Nos di Tienda di Educacion tambe a conoce algun reto y asina mes a sigui brinda servicio na nos comunidad di Aruba. Semper brindando servicio gratuito, profesional y cu dedicacion na bienestar general di nos muchanan.
Tienda di Educacion ta na caminda pa su 10 aña di aniversario brindando servicionan gratis na henter comunidad di Aruba. Tin varios servicio cu ta wordo duna pa e expertonan di Tienda di Educacion ora ta trata sosten y guia na mayor of educador. E servicionan ta consisti di duna charla, tayer of informacion na diferente scol y tambe gruponan meta. Un otro servicio importante cu Tienda di Educacion ta brinda ta sosten y guia telefonico via 161 di dialuna pa diabierna. Mayor of educador por tuma contacto cu Tienda di Educacion pa cualkier pregunta ora ta trata lantamento di un mucha. Tambe si ta desea un conseho con pa comunica of disciplina un yiu. Por yama of bishita Tienda di Educacion tambe pa un consulta gratis na nan oficina situa den edificio di Centro pa Hoben y Famia, adres Wayaca 68-C. Prome cu aña escolar nobo cuminsa Tienda di Educacion ta comparti algun tips cu mayornan y pueblo di Aruba.
Ban prepara y sostene nos yiu pa bay scol bek.
Drumi trempan, prepara uniform, prepara tas, pone sandwich cla y sali na ora pa evita e trafico druk di mainta. Esakinan ta algun di a tantisimo cosnan cu mester tene cuenta cu ne prome cu yega scol. Pesey ta importante pa planifica y prepara di antemano hunto cu e yiunan pa asina haci e proceso aki uno mas placentero. Tin algun mucha lo sinti presion otronan lo tin hopi alegria y tin esnan cu no lo mustra nan reaccion, ainda. Pues tin asina tanto factor cu mester tene cuenta cu ne y sin lubida di mayornan cu tine poco dificil pa laga nan yiu atras, vooral si ta trata di prome dia di scol.
Importante ta pa duna bo yiu(nan) un palabra di sosten y tambe recorda nan cu bo ta stima nan masha hopi mes. Kisas como mayor bo tambe ta nervioso y no sa con pa no laga esaki mustra. Ta honesto y comparti bo sentimento cu bo yiu(nan). No ta facil pa wak nan crece, asina liher, pa realisa cu tempo no ta warda y ni para keto pa niun hende. Traha tempo pa comparti momentonan agradabel cu bo yiu(nan). Comparti recuerdonan di antes tempo cu bo persona mes a bay scol. Ta leuk pa conta storia real y recorda esakinan.
Den un articulo anterior nos a para keto na algun tips pa mayor y nos ta pone enfasis ariba esakinan un biaha mas. Pues por practica y aplica esakinan den transcurso di e periodo nos dilanti.
Papia cu bo yiu tocante e cambio pa bay scol. Bo lo por haci uzo di un kalender pa mustra bo yiu cual dia e lo bay scol. Ta bon pa bo repasa con e dia of rutina nobo lo mustra. Bo lo por papia tocante e ora pa lanta ,baña, bisti, come, wordo hiba scol y wordo busca atrobe pa bay cas, na famia of un traimerdia. Palabra ken ta hibe of trece pa e por sa ken pa spera.
Palabra con bo yiu lo kier pa abo sostene riba su prome dia(nan). E kier pa e mayor cu ta hibe baha cu ne of e lo kier baha su so? Porta e ta mas comodo si e mayor ta warda un rato cu ne sinta den auto. Kiermen ta importante pa check pa haya sa kico bo yiu lo desea. Esaki ta depende tambe cuanto aña bo yiu tin. Dimes esun nan mas chikito lo mester di hopi mas sosten cu esun nan mas grandi.
Tienda di Educacion ta desea tur nos muchanan, educador y tambe tur mayor tur clase di exito cu e aña escolar nobo. Nos tin confiansa cu nos muchanan y hobennan lo haci nan maximo esfuerso pa logra nan meta den e aña academico nobo. Tienda di Educacion ta recorda pueblo di Aruba cu nan ta na servicio pa conseho of sosten den lantamento di un mucha. Por yama Tienda di Educacion na 161. Por comunica cu nan tambe via عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته., bishita e pagina di Facebook, YouTube channel of subi ariba e website www.tdearuba.com pa mas informacion.
Tienda di Educacion ta sostene mayor, educador of cualkier persona cu tin e tarea pa lanta un mucha cu cualkier preocupacion of pregunta. Tur yamada na 161 ta anonimo. Un sonrisa den cara di nos yiu(nan) por haci milager. Ta importante pa mayor of educador trece alegria pa nos yiu(nan) por tin un infancia sano y desaroya positivamente. Bienestar y siguridad di nos muchanan ta responsabilidad di nos tur! Ban cuida y lanta nos muchanan cu hopi amor y compasion pa asina crea futuro generacion sano y di bon boluntad. Ta un bon ehempel pa nos muchanan y haci un diferencia positivo den nan bida.
