BARCELONA: Mas dolor di cabez pa e compania di petroleo na Venezuela! Pero e ta demostrando con lakso e compania a bin ta anda ultimo añanan pa cu mantenimento di nan equiponan.
E siman aki un accident a socede riba tereno di e refineria San Joaquin di PDVSA cu ta procesa gas tambe na pueblo di Anaco, estado Anzoategui.
Aki un tipo di schoorsteen special cu yama ‘Flare-Tower’ a bin abao. E tipo di schoorsteen aki di 105 meter halto, ta kima gas residual cu ta worde produci eynan.
E Flare-Tower a cay completamente, posiblemente debi na rafaganan fuerte di biento ya cu e momento ey awa tabata yobiendo masha duro. Trahadornan a core stop produccion di gas y e 1.300 bari diario di crudo.
E accident aki a causa tambe un lekmento fuerte di gas, cu personal mester a traha rapidamente pa cera demas valve pa evita cu gas a sigui plama den pueblo.
Un organizacion cu ta vigila refinerianan na Venezuela, a bisa cu e Flare-Tower aki a cay debi cu e wayanan cu tin rond di dje pa yuda sostene, a worde horta algun tempo pasa.
