Clifford Rosa, director Fundacion Rancho: *A pidi colaboracion pa e proyecto 2020-2024
ORANJESTAD (AAN) – Stichting Rancho tambe a wordo invita pa reuni cu Formador Evelyn Wever-Croes, den cuadro di e reunionnan cu stakeholders externo relaciona cu formacion di Gabinete Wever-Croes II.
Clifford Rosa, director di e Fundacion a expresa den conferencia di prensa cu a sigui despues di e reunion, cu nan ta hopi gradici cu e oportunidad aki, cu por a trece Fundacion Rancho, na conocimento na Mesa di Formador.
Nan a trece dilanti diferente punto importante, entre otro, cu dia 20 di April 2020, a inicia e programa “celebrando 200 aña di Oranjestad” y den e contexto aki a cuminza elabora con ta bay pidi colaboracion di gobierno, pa asina por mira e proyecto aki encamina di 2020 pa 2024.
Clifford Rosa a bisa cu sigur, nan kier un bon colaboracion di Gobierno y di tur e departamentonan y stakeholders tambe pa asina sigui preserva e historia y cultura di Rancho, pero aworaki pidiendo proteccion di e area di Rancho, y claro e area di Oranjestad, mirando cu ta necesario pa un pais su capital wordo proteha y crea un maneho. Un maneho pa por conserva un parti di Aruba su herencia cultural, historia, monumentonan y tur loke Rancho tin, manera e fornu di kalki y locual cu Fundacion Rancho a bin ta haciendo.
Ampliando un poco riba e tema Clifford Rosa a bisa cu locual nan ta pidi gobierno ta pa pone mas atencion riba e afspraaknan y potencial cu UNESCO ta trece cune, pero tambe e SDG’s cu ta un herment of tools, sumamente interesante y importante, mirando cu pa SDG’s Fundacion Rancho ta para pa number 17 cual ta pidi pa colaboracion. Sin atende cu colaboracion no por atende cu e otro numbernan di 16 te number 1, di e SDG pa asina por tin un miho ehecucion di e materia cu e fundacion kier papia di Oranjestad.
Clifford a acentua cu den e caso di Fundacion Rancho nan no ta buscando fondo for di Gobierno, sino un bon colaboracion cu nan por bay den e mesun tematica, tanto den mantencion pero tambe den proteccion di cierto areanan. El a bisa cu si nos ta bibando awo cu un area di Marine Park na Oranjestad, ya caba kiermen cu tin algo den proteccion; pero si wak e sitionan arkeologico cu tin tambe den e area di Oranjestad, cu mester tene cuenta cune. Tambe den e area di Misa Catolico te esun di Misa Protestant, por wak nan areanan hopi importante cu ta necesario pa wordo proteha den su totalidad.
