Hopi auto ariba acera na San Nicolas ta un atentado contra e seguridad di e peaton

ORANJESTAD (AAN):   Ora di drenta Caya Grandi na San Nicolas mesora por ripara un cantidad di auto para ariba acera.

Esaki ta causando hopi disgusto cerca e peatonnan cu ta haya cu nan ta wordo stroba pa cana safe ariba acera. Pero nan ta bin topa cu autonan cu a parkeer eyriba y ta ocupa practicamente henter e espacio.

            Un apelacion ta bay na e instancianan concerni pa atende cu e tema aki ya cu por mira cu tin luga pa parkeer den e area. Sinembargo, e chauffeurnan ta prefera pa para nan auto ariba cerca poniendo e peaton na peliger.

            Por a mira tambe cu tin autonan cu te hasta na baki (bumper) ta casi ariba caya locual tambe por ocasiona un boksmento cu por trece cu ne dañonan material.

            E ciudadanonan ta spera di por mira cu den e dianan aki tin cambio den e situacion aki den Caya Grandi na San Nicolas.