Consumidor na Aruba y na mundo ta comparti topico di DIARIO
- Den encuesta Aruba a duna prueba cu e ta pensa segun logica
- Guera, petroleo, clima ta pakete peligroso pa costo di bida
ORANJESTAD (AAN)- E resultadonan di Banco Central di Aruba ta refleha e realidadnan cu DIARIO pa basta tempo y cu hasta tabata titulonan di nos articulonan principal na entrada di 2023.
Pa ta sincero, si na final di e segundo trimester di 2023, e consumidor di Aruba tabata papia di un situacion glorioso den cual mundo lo ta nabega, DIARIO lo mester a yega na e conclusion cu su advertencianan na e Pueblo di Aruba, no tin ningun balor.
E realidad cu Banco Central di Aruba a presenta riba e preocupacion grandi cu ta biba cerca publico na Aruba, ta duna prueba cu Pueblo di Aruba ta inteligente, ta uza su cabez, ta na haltura di informacionnan importante cu DIARIO a presenta y cu henter mundo ta comparti.
DIARIO for di e ultimo parti di 2022 a averti Aruba cu 2023 lo por a bira aña di recesion, di caida financiero y economico mundial, loke te awor ta un menasa serio pa henter mundo.
E problemanan cu e consumidor di Aruba conoce ora e mester paga pa prijsnan rond Aruba, ta mara directamente na e costo enorme di bida di e consumidor pero, manera DIARIO a adverti tambe pues, di tur negoshi y di Gobierno.
Den e situacion mundial actual, tanto e Arubiano como su dirigentenan y informadornan mester biba a base di e alerta cu mundo ta enfrenta problemanan serio.
E expresion di e situacion serio na Aruba sigur ta wordo confirma pa e hecho cu Gobierno di Aruba mester tuma e pasonan y medidanan necesario pa asina paga debenan di Aruba pa Aruba realmente lo bati bancarota a base di e debe nacional cu orguyosamente a wordo crea pa Aruba paga awe hunto cu tur e proyectonan PPS.
E situacion financiero di Aruba ta wordo provoca dor di e debe nacional y di PPS cu a wordo crea segun e plan di maneho di Gobierno Mike Eman, cu a papia hasta di un pago orguyoso di e debe cu el a crea.
Pues segun e concepto cu Gobierno Mike Eman a crea e desaster financiero di Arua, Aruba mester ta orguyoso cu Aruba mester paga debe y no por uza e sumanan enorme di interes pa proyectonan sigur pa e parti mas vulnerabel di comunidad, manera nos grandinan y personanan cu no por percura pa nan propio entrada.
Economia di Aruba a cera su portanan na 2020 ora pandemia a bati na porta y Gobierno mester a percura pa tur compania priva no mester a manda tur personal cas.
Prijs di petroleo a subi stage na 2022 y inflacion a deshaci di normalidad financiero di Arubianonan y di Aruba.
Prijsnan a subi manera fli, mientras Gobierno mester a sigi paga e debenan y e interes riba debenan orguyosamente.
Guera Mundial a bira amenaza na 2023 y te awe ta sigui amenaza.
Aruba por a cera su presupuesto pero a base di medidanan pa e paga e debenan pa asina evita cu Aruba mester bati bancarota y entrega su Status Aparte sigur financiero.
Awor te awe, den e situacion mundial actual, por DIARIO mescos cu un grupo grandi na Aruba y na mundo, por fiesta?
E situacion financiero mundial ta keda preocupante.
Situacion desastroso ta reina ainda a base di e Guera di Ukraine, cu no ta duna ningun seguridad.
Clima ta causa diariamente horor rond mundo di e lugarnan mas friu te e lugarnan mas calor na mundo.
Petroleo mester a cuminsa bati retirada pero su prijs ta sigui subi atrobe y esaki lo bolbe afecta tur prijs rond mundo.
E encuesta di Banco Central di Aruba a entrega e prueba cu Arubianonan ta riba e mes linea cu DIARIO, cu a nace como prome matutino pa informa e Arubiano debidamente.
E encuesta di Banco Central di Aruba a duna prueba cu e Arubiano ta usa e logica di e mayoria na mundo, cu mester enfrenta e situacion mundial actual cu sentido di responsabilidad y cautela, manera DIARIO a adverti for di 2022 a base di informacion concreto.
Medidanan di Gobierno na Aruba y hopi pais liber, a evita un recesion y na Aruba e percura pa un recuperacion.
Pero e peliger no a stop di existi mientras tin Guera di Ukraine, mester enfrenta cambio di clima cu tur su exigencianan ta mishi directamente cu e bida cu tabata considera normal y mester yega na un solucion pa petroleo, cu te ainda ta e gran motibo cu e motor economico di mundo ta funciona.
