Historia di Aruba  - 31 Aña pasa

Avalancha di lodo y piedra a basha for di Hooiberg caminda 1 persona a fayece

== E desastre cu a tuma lugar na Hooiberg tabata uno cu a conmove henter Aruba. Awe ta exactamente 31 aña di e tragedia aki caminda e Sra. Inne Frank a wordo sorprendi pa morto. Normalmente ta lesa di e tragedianan aki den exterior, y no a pensa nunca cu esaki por a pasa na Aruba.

E anochi ey di 13 di October tabata tin un awacero torencial na Aruba acompaña pa strena y lamper. Hasta personanan cu generalmente gusta awacero acompaña cu strena y lamper a keda sorprendi pa e tempo cu a presenta su mes Diasabra marduga. Awacero a causa inundacionnan na varios casnan. E prome yamada a drenta na Centro di Alarma Diasabra marduga pa 2.37 minuut y despues tres mas a drenta tras di otro cu un cas a yena cu awa na Santa Cruz. Y mesora Bomberonan a prepara pa bay duna asistencia. Pa 3.18, yamada a drenta atrobe cu na Hooiberg un cas a yena cu awa, y instante despues yamada a drenta cu un cas a basha abao na Hooiberg 93.

Den 7 minuut personal di bombero a yega na e sitio y nan a constata cu e situacion tabata sumamente alarmante y te hasta desastroso debi cu parti di e cas a basha abao y e sitio ta cubri cu lodo, piedra, baranca, cadushi, y matanan grandi cu a basha for di Hooiberg. Bomberonan mesora a pidi pa mas asistencia y un bulldozer pa habri caminda pasobra no tabata tin caminda pa pasa. Paden di e camber tabata tur tapa bao di e lodo y loque a baha for di e cero bin abao.

No tabata facil pa a yega cerca y mas ainda cuminza cu e trabaonan di rescate, pasobra no tabata sa unda mester a cuminza debi cu awa tabata basha yobiendo y lodo tabata basha formalmente for di Hooiberg. Pa colmo coriente a bay y esey a pone cu trabao a obstaculiza mas ainda.

Presentenan tabata mira ora cu lamper dal riba Hooiberg, lodo tabata basha cu sonido fuerte.

  E tension a bira mas fuerte na e sitio ora cu e informe a drenta cu tin un señora perdi den e ruinanan di e cas y e lodo. Masha cauteloso e buskeda a inicia pasobra ningun hende sa unda e señora ta y te riba caminda por a mira avalancha di lodo ta lastra tur muebles di e cas bay cune.  Poco poco bomberonan a cuminza yega na e camber cu a basha abao. Den e camber tabata tin un baranca grandi y hopi piedra, muraya, bali di cas, zink, palo basha den otro hunto cu tur e lodo. Bomberonan tabata cana te na rudia den e lodo y sacando piedra y bloki for di e camber.

Dia a cuminza habri y den careda di 8’or di mainta bomberonan a encontra curpa di e señora perdi den lodo y bao di piedranan grandi den camber unda e desaster a tuma lugar. E señora Inne Frank tabata morto riba su cama y tapa bao laken. Despues di basta movemento di piedra y te hasta mester a kibra piedra cu mokel por a saca e curpa sin bida for di e ruina. Un baranca di mas of menos 1 metro y mei hancho y grandi tabata den e camber.

Si no tabata pa e caminda di asfalt cu a pasa dilanti Hooiberg e otro casnan cu ta keda na otro banda di caminda lo a sufri hopi mas daño cu solamente lodo. Ya cu ora e lodo a yega ariba caminda el a plama for di otro. E lodo cu a plama a cubri mas o menos un espacio di 50 meter y cu hopi trabao bulldozernan a logra recoge esaki. E incidente aki tin e habitantenan den vecindario di Hooiberg te cu awe hopi preocupa ya cu nunca nan por a pensa cu algo asina por a pasa.