ORANJESTAD (AAN) – Parlamentario Hendrik Tevreden tambe a hiba palabra durante e conferencia di prensa di Fraccion di MEP,
dedicando atencion na e reunion cu nan tabata tin Dialuna mes, cu Fundacion pa Nos Comunidad (FPNC).
E parlamentario a bisa cu FPNC ta un fundacion cu a duna su mes e derecho di existencia, y e ta corda cu na 2020 fraccion di MEP a bishit'e na Emmastraat, despues nan a bay na Kibrahacha pa wak con nan ta opera, y awo nan a muda pa e edificio di ex-Frio Max, pero nan ta en busca di un lugar stabil unda cu nan por tin tur cos bao un solo dak.
“Nos peticion como parlamento ta djis esey. Pa nan por haya e subsidio necesario pa nan por keda existi, haya un edificio unda nan por opera bao un solo dak, y tambe pa nan ricibi e ayudo necesario pa nan por sigui opera na 2022”, Treveden a señala.
FPNC a duna fraccion di MEP cifranan di e personanan cu ta haya pakete: 28.8% ta personanan ilegal, 46.3% ta di nacionalidad hulandes y 24.9% ta personanan cu tin permiso pa ta na Aruba. 678 pakete ta bay pa babynan, y esey ta nifica for di recien naci te cu edad di 3 aña.
“Dus, e fundacion tin tur cos documenta y nan ta duna un bista basta realistico di tur locual cu nan ta haciendo. Nos ta kere cu e famianan cu ta tumando pakete di Fundacion pa Nos Comunidad, tin cu keda haya esaki, so & so, te cu December. Esaki ta e idea pa nan keda ricibi pakete, pero tin cu sinta na mesa cu Gobierno, pa wak cual ta bay ta e pasonan for di dia 1 di Januari 2022 padilanti, con nan ta continua” Parlamentario Tevreden a señala.
Tevreden a agrega cu e sumanan aki ta rond di 12 pa 14 miyon florin pa aña, pues un suma bastante grandi y parlamento tin cu bay sinta cu gobierno pa sa, con nan ta bay keda provee e suma aki pa cada aña, pa e grupo concerni por keda ricibi pakete.
“Pero tambe nos ta mira cu tin un grupo, vooral di grandinan, cu tin cu keda ricibi pakete pasobra e pension no ta acapara e necesidad total cu nan tin pa luna. Tambe nos sa cu tin un grupo cu ta den bijstand cu tin cu haya trabao of haya aumento di nan bijstand pa por yega na e entrada minimo cu nan mester pa sigui cubri nan necesidadnan” e parlamentario a subraya.
El a expresa cu locual e kier a mustra den e conferencia aki ta, cu e problemanan social a keda serio, vooral desde Covid-19 bin ariba, y cu mester tuma un postura riba kico ta bay ta e maneho pa e tempo nos dilanti. “Y nos di Parlamento, logicamente, lo invita gobierno pa por ilustra na nos kico ta e indicacion y direccion cu nan ta bay, pa asina nos tambe por tin un bista mas duidelijk ora cu tratamento di presupuesto tuma lugar, pa nos por dirigi tambe fondonan den e direccionnan necesario y adecuado cu mester bay”. Asina Parlamentario Hendrik Treveden a conclui.
