Guido Picus, un yiu di tera cu alma empresarial ta desafia e 'Status Quo' den su buki nobo

"Maverick Soul"... 

ORANJESTAD (AAN):  Inspira den e deseo di yena un bashi den loke ta e mundo di literatura empresarial, Guido Picus. un yiu di tera masha conoci na Aruba den mundo di Marketing Digital y aworaki estableci na Iceland, hunto cu su socio Michael Lance a skirbi y a caba di lansa"Maverick Soul - Unlocking Personal and Business Wealth; Contrarian Wisdom & Growth Hacks for Monetizing Your Ideas".

            Den un entrevista, nan a revela e motivacion tras di nan obra literario cu ta yama e atencion riba e importancia di e evolucion personal den mundo empresarial.

            E buki ta presenta un enfoke holistico pa exito den negoshi, combinando tacticanan di negoshi cu elementonan critico di crecemento personal. Pa solopreneurnan, fundadonan di startup, y tur esnan cu ta buscando desafia e 'status quo' den nan bida profesional, "Maverick Soul" ta un guia vital.           

Kico a inspira bo pa skirbi "Maverick Soul"?

Michael: "E buki a nace for di observacion di un buki den literatura tradicional di "entrepreneurship'. Nos a nota un scarcedad di recursonan cu no solamente ta guia riba strategianan di negoshi, pero tambe ta enfatisa riba e importancia di evolucion personal den e trayecto empresarial. "Maverick Soul" ta trata di yena e bashi aki y ta ofrece un enfoke holistico pa e exito". 

Pa ken e buki aki ta destina?

Guido: "Aunke mayormente ta dirigi na solopreneurnan y fundadonan di startup, "Maverick Soul" basicamente ta pa cualkier persona cu ta buscando desafia e estado cu ta existi den nan bida profesional. Si bo ta un empresario aspirante of un hende cu ya caba tin su negoshi estableci, e buki aki ta ofrece perspectivanan balioso pa transforma ideanan innovativo den un empresa exitoso". 

Kico ta haci "Maverick Soul" diferente for di otro bukinan di entrepreneurship?

Michael: "Na contrario di guianan convencional cu ta enfoca solamente riba tacticanan di negoshi, "Maverick Soul" ta elabora riba esakinan cu elementonan critico di crecemento personal y mentalidad. Ta un manifiesto cu ta stimula e lesadonan pa pensa di manera no convencional y saca beneficio for di nan forsa unico den un mundo digital creciente". 

Bo por comparti algun conseho principal cu bo ta desea resalta for di e buki?

Guido: "Un tema central ta e poder di 'maverick thinking'. No ta trata solamente di ta diferente; sino di ta inovado, compronde e importancia di e alfabetisacion digital y tin e resistencia necesario pa sigui camindanan menos convencional te na e exito". 

Con "Maverick Soul" ta aborda e desafionan di e tendencianan digital?

Guido: "E buki ta remarca riba con e empresarionan no solamente por adapta, sino tambe capitalisa riba tendencianan digital. E ta papia tocante e poder transformativo di AI y e tecnologia digital den negoshi, enfatisando e necesidad di un enfoke proactivo riba e hermentnan aki". 

Kico ta e papel di crecemento personal den exito e empresarial, segun bo buki?

Michael: Crecemento personal ta wordo presenta como e fundeshi di e exito empresarial. E buki ta argumenta cu e exito empresarial ta intimamente conecta cu e capacidad di un persona pa crece, adapta, y evoluciona, no solamente profesionalmente sino tambe personalmente". 

E principiantenan den entrepreneurship por beneficia di "Maverick Soul"?

Guido: "Sigur. E buki ta structura cuidadosamente pa atende cu hende nobo como empresarionan experencia. E ta expone un comprondemento fundamental di principionan empresarial y despues ta traha riba esaki pa yega na strategianan mas avansa. Principiantenan lo haya e ehempelnan di bida real y guiansa stap pa stap specificamente util pa navega den e prome etapanan di nan aventura empresarial". 

Cua ta un conseho principal pa esnan cu ta cuminsa nan trayecto empresarial?

Michael: "E conseho mas critico ta keda adaptabel y habri pa siñamento. E paisahe empresarial ta cambia constantemente, y exito hopi biaha ta depende di e capacidad di un persona pa evoluciona cu e cambionan aki. E buki aki ta enfatisa e importancia di siñamento continuo, tuma risico, y tenacidad". 

Considera e comprension di AI y tecnologia ta esencial den mundo di negoshi awendia?

Guido: "Ta absolutamente esencial. Den "Maverick Soul," nos ta discuti con AI y tecnologia no ta solamente hermentnan, sino catalisado pa innovacion den negoshi. Compronde e tecnologianan aki ta esencial pa cualkier empresario cu kier keda actualisa y competitivo.

E buki ta duna e perspectivanan practico riba con pa integra e tecnologianan aki den varios aspecto di negoshi efectivamente". 

Kico bo ta spera cu lesadonan lo logra despues di lesa "Maverick Soul"?

Guido: "Nos ta desea pa e lesadonan sali c'un sentido renova di proposito y claridad den nan trayecto empresarial. Nos kier nan sinti nan mes ekipa cu e conocemento y hermentnan necesario pa navega den e complehidadnan di e negoshinan moderno, explota nan potencial unico, y na final, logra un nivel di exito cu resona cu nan aspiracionnan personal y profesional. 

            Pa tur esnan cu ta cuminsa nan trayecto empresarial y esnan cu ya caba ta den e mundo di negoshi, "Maverick Soul" ta presenta un guia cu ta apto pa tur nivel di experiencia. E buki ta un guia pa bay for di principionan basico di entrepreneurship te na strategianan mas avansa. Michael y Guido ta yama e lectornan pa mantene nan adaptabilidad y mentalidad di siñamento, ya cu e paisahe empresarial ta cambia continuamente.

Skirbi pa Yorleny Oduber