Grupo Palmaruba a haya e financiamento pa sigui y termina proyecto di vivienda Caribbean Town

Ing. Victor Acosta a anuncia:

ORANJESTAD (AAN) – Shandira Henriquez, ken ta forma parti di e team di Caribbean Town, a comparti cu pueblo di Aruba un noticia grandi, hunto e partner financiero RBC Royal Bank Aruba. Pa tal efecto Henriquez a pasa palabra pa Ing. Victor Acosta, Director Manager di e compania cu ta desaroya e proyecto Caribbean Town y tambe e  proyecto Palmaruba.

Acosta a bisa cu esaki tabata un dia hopi special pa Palmaruba Group y pa su proyecto di vivienda Caribbean Town y a anuncia cu e compania a ricibi e financiamento necesario pa sigui y termina e construccion di e viviendanan y logra entrega nan na tur e cumpradornan.

El a splica cu e Proyecto Caribbean Town a surgi di e plan cu Gobierno di Aruba hunto cu su Departamento di Obranan Publico y Sector priva a uni forza, pa crea un solucion moderno di residencia cu ta pas cu e idea di gobierno pa construi na unda un famia local por biba confortable, den un ambiente sigur y saludable, sin mester di construi un cas tradicional.

“E proyecto aki di construccion tambe tin cu cumpli cu cierto norma y  codigonan cu ta hacie sostenible for di su diseño di arkitectura, construccion y operacion. Kiermen, ora un vivienda keda cla e famia cu ta biba den dje por sinti y disfruta di spaar energia, produccion minimo di CO2, gasto minimo di awa, tratamento di awa residual, area berde cu produccion  di oxigeno, ademas di ofrece areanan recreativo y di deporte unda su habitantenan por mantene nan mes den bon condicion fisico, pero tambe socializa cu otro bisiñanan y crea un comunidad sano y solidario cu ta e obhetivo principal di nos compania subsidiario Jambo”, Acosta a expresa.

Acosta a menciona cu e inversion aki ta cerca di 90 miyon florin, y e ta consisti di 328 vivienda, 4 local comercial, ekivalente na casi 30 mil meter cuadra di construccion.

Despues di mas di ocho luna di deliberacion cu ehecutivonan di RBC nacional y internacional, e compania magno Alfa Aruba, Jambo y RBC a logra firma e “long agreement” dia 8 di Februari ultimo. Esaki lo permiti Jambo sigui e construccion di fase 1, cuminza e fase 2, y caba e proyecto completamente. Jambo su plan ta entrega e fase 1 den e di dos cuartal di 2025, fase 2 na final di 2025, y entrega di e viviendanan lo ta progresivo y no pareu, Victor Acosta a duna di conoce.

Director di RBC Royal Bank Aruba, cu ta e partner financiero di e proyecto, Pierre Rafini, a felicita Victor Acosta y a desee tur sorto di exito cu e desaroyo di Caribbean Town.