Grupo na estado di Ohio ta organizando evento di ‘Swim Around Aruba’

ORANJESTAD (AAN): Den fin di siman a tuma nota cu un condado cu ta keda hopi cerca di Cleveland na estado di Ohio na Merca,

ta organizando un actividad hopi peculiar for di Diamars 1 di April 2025 te cu 31 di Mei 2025.

   Un compleho deportivo yama ‘Lorain County Metro Parks Amherst HealthPlex’ ta organizando e reto di ‘Swim Around Aruba’.

   E programa ta invita personanan di tur edad biba na Ohio pa inscribi, y reta nan mes pa landa e mesun distancia cu lo tin di tuma pa dal un buelta completo rond di isla di Aruba, cu ta igual cu 42,6 miya, segun Stevie Soboslay, kende ta coordinador di Facilidad Aquatico na Amherst HealthPlex.

   El a splica cu antes e tabata traha na un compleho deportivo aquatico na ciudad di Oberlin, y eynan tambe a yega di haci un programa similar cu esaki.  Nan ta habri pa esnan no-miembro tambe bay participa den esaki.

   Segun e promo, e participacion na esaki ta gratis, aunke no-miembro tin di paga pa un day-pass pa completa e reto.

   Tambe por cumpra un T-Shirt cu nan lo ricibi unavez nan keda cla cu e reto.

   E programa lo tuma lugar na e HealthPlex, unda lo tin un buki pa marca e distancia di tur participante pa cada dia, pa asina nan por regresa despues y sigui acumula miya te ora cu nan a “landa tur rond di Aruba”  na forma virtual.

  A compronde cu otro lugar a organiza tipo di actividad similar, y nan tur a resulta exitoso y cu hopi interes di publico.  Ta facil asina pa cumpli cu e reto, landando den un piscina.  Pasobra na Aruba den e situacion real, e lama bruto na costa panort lo ta demasiado peligroso.