Grupo di profesionalnan a haya certificado pa e prome modulo di e curso 'Dominio di Idioma Papiamento'

ORANJESTAD (AAN):   Diasabra mainta a tuma luga e entrega di certificado di e prome modulo di e curso 'Dominio di Idioma Papiamento' organisa pa Fundacion Corector di Papiamento.

            Un grupo di profesionalnan di tur sector, priva como publico, a join e curso aki cu lo tin un duracion di mas c'un aña.

            Despues cu 20 aña pasa gobierno a organisa un curso na nivel di HBO ningun instancia of organisacion mas a organisa un curso di e nivel aki.

            Pa e motibo ey, Fundacion Corector di Papiamento a acerca Dr. Joyce Pereira y Magistrado Linguistico Ramon Todd Dandare pa duna nan un man pa organisa un curso di nivel.

            Pa por a bira parti di e curso aki, e participantenan prome mester a pasa un test di admision caminda mester a proba cu tin nivel F2/A2 y evalua habilidad di lesa y habilidad di skirbi texto funcional.

            Mester tene cuenta  cu e nivelnan di dominio di idioma, manera: habilidad oral, habilidad di lesa, habilidad di skirbi y reflexion riba idioma.

            Ta trata di 4 nivel di dominio di idioma:

- F1/A1 pa final di enseñansa primario y enseñansa special

- F2/A2 pa final di EPB, MAVO, MBO1, 2 y 3

-F3 pa final di MBO-4 y HAVO

-F4 pa final di VWO.

            E meta di e curso aki ta pa e participantenan yega nivel F3 despues di pasa exitosamente 4 modulo. E curso aki ta pa yena e necesidad cu tin na Aruba pa sigui curso di Papiamento cu ta yuda e ciudadano yega na un nivel aceptabel di Papiamento y banda di esaki aplica esaki den bida diario como tambe na trabao.

            Diasabra ultimo, un grupo basta grandi, tur hende muhe, a haya nan certificado pa e modulo uno. Awor tur ta cla pa continua cu e modulo dos aki dos siman.

            Masha pabien na tur cursista y na e docentenan pa nan tremendo trabao.