Grupo di cabezante di scol a gradua den ‘Guia Planifica di Maestro’

ORANJESTAD (AAN): Riba Diabierna atardi a tuma lugar na Colegio Santa Teresita na San Nicolas, e entrega di certificado di un interesante curso cu a culmina.

   Jeanine Fingal kende ta cabezante di Colegio Santa Teresita, a splica cu a entrega certificado na ocho cabezante di scolnan preparatorio y tambe scolnan primario, pasobra a finalisa e segundo tanda di e curso “Guia Planifica di Maestro”.  E prome tanda a tuma lugar aña pasa.

   Danki na e curso aki, awor e cabezantenan a haya e hermentnan, y tin e habilidad basico awor pa guia e docentenan manera planifica riba tereno pedagogico didactico den su klas.

  Cabezantenan a ricibi e contenido di e training aki, cu ta contene e.o. conoce nan rol como lider den enseñansa, conoce e estilo di duna les di e docentenan, y tambe nan estilo di lidera den scol, conoce e procedimento ta con ta guia un docente na un forma planifica, y cera conoci cu ‘coaching’ den cuadro di guia di e docente, reflexiona y bira conciente di nan rol como lider.  A practica y conoce diferente tecnica di combersacion, e.o. tambe siña con pa duna y ricibi feedback na docentenan.

   Cabezantenan cu a ricibi certificado ta Angela Romero, Sebastiaan Kraaijkamp, Derek Peterson, Maybeline Biesum, Nanette Lacle, Mirla Tromp, Mary-Lee Nicolaas, Nadine Kirindongo, y Sandra Hurtado.