Grupo di 125 empleado a bay cana inspecciona plataforma di Aeropuerto

ORANJESTAD (AAN): Cada cuartal, e Departamento di Seguridad di Aeropuerto Internacional Reina Beatrix ta organiza un caminata cu ta ser yama ‘Foreign Object Debris (FOD) Walk.

   Esaki ta un caminata di 15 te cu 30 minuut, durante cual empleadonan di Aeropuerto ta yuda inspecciona e plataforma di avionnan dilanti Terminal y asina recoge y kita cualkier obheto cu ta un menaza pa operacion di avionnan.

   Manera ta conoci, cualkier obheto (FOD) benta abao sea banda di pista of riba di plataforma, por daña motornan di avion na un forma critico, y tambe herida personal cu ta traha na Aeropuerto.

   Sigur un palabra di danki na e ekipo di seguridad aki y e 125 participantenan pa nan dedicacion di tur dia pa haci e Aeropuerto di Aruba mas sigur.  Hunto nan ta riba e mision di bira un di e aeropuertonan mas sigur di Latino America y Caribe.