ORANJESTAD (AAN) Mientras universalmente a celebra dia 8 di Maart, e Dia Internacional di Hende Muher,
honrando e tema “Inverti den hende muher, acelera e progreso” y cu tur mensahe di pabien via rednan social, y di forma personal, a resalta e aspectonan mas bunita di e grandeza cu ser un hende muher ta encera, locual ta absolutamente mereci, un dama local a comparti e siguiente historia personal.
E dama a comenta cu lamentablemente, tambe ta existi casonan di falta di solidaridad y empathy meymey di hende muher manera su caso, pero claramente no ta algo pa generaliza. Locual ta ta interesante con el a sali dje exitosamente, despues di a sinti den carni propio un tipo di envidia y egoismo, cu a pon’e busca otro trabao y renuncia na loke e tabata haci e momento ey, no obstante su diploma.
Pero na momento cu e tabata busca otro opcion, no tabata tin vacante den su ramo, pero si un famia pa cria y e entrada di su casa so no tabata suficiente. Pa medio di un conocir el a aplica pa un trabao den construccion. Construccion? El a puntra su mes. “Lo mi por cu ne?” E ta algo pa hende homber, e ta mucho duro pa un curpa femenino nada ancra”. Pero haciendo honor na e expectativa cu “hende muher ta balente y no ta aruga su cara pa saca su famia dilanti” el a tuma e reto.
Na cuminzamento e tabata sinti su mes fastioso, manera e no ta pas eyden, pero e otro dos damanan di ken el a bira colega a sirbie di inspiracion y ehemplo. Poco poco cu esfuerzo y boluntad al a siña y traha duro te cu el a haya experiencia den tres aña largo caba. Aworaki, e ta bendiciona e trabao aki, e ta bon paga, y e tin un ofishi cu hamas a pasa den su cabes cu e lo haya su mes ta haci, hay’e interesante y stim’e. Aworaki e ta capaz di yuda un bisiña cu ta drechando su cas. E ta mira su mes den futuro cu hopi mas conocemento y trayectoria cu hasta un dia, e lo por yega di lanta su propio compania. Si! Enberdad hende muher tin un don di perseverancia, un forza espiritual cu Dios so por dun’e y den su gran mayoria e palabranan “mi no por” no tey mas. E mes ta testigo.
