Green Overseas ta presenta resultadonan di proyecto pa reduci emisionnan di carbono y costo di combustibel den flota di gobierno

Aruba ta transformando su futuro energetico,

ORANJESTAD (AAN):  Aruba ta yegando un momento historico den su proceso pa transicion di energia. E Programa Green Overseas (GO), un iniciativa di electrificacion di e flota di vehiculonan gubernamental, ta yega na su fase final despues di dies luna di trabou intenso. Bou di liderazgo di Minister di Finansa, Asunto Economico y Sector Primario, mr. Geoffrey Wever, Aruba tin un plan concreto pa realisa e vision pa promove e transicion di vehiculonan di combustibel  pa  vehiculonan electrico.

E proyecto, titula 'Reduccion di Emisionnan di Carbono Relaciona cu Transporte y Costonan di Combustibel di e Flota di Vehiculonan di Gobierno di Aruba,' a ser financia pa Union Europeo cu un subsidio di €190,000. Expertise France ta manehando e proyecto, y e empresa Aleman di sistema di energia Energynautics GmbH ta esnan cu ta implementando esaki. Den e proceso aki, Minister Geoffrey Wever ta trahando hunto cu DEACI, DOW y ELMAR, pa asina sigura cu e cambio ta sostenibel, ta tuma lugar na un forma responsabel y cu beneficio concreto pa nos pais.

E obhetivonan di e programa aki ta multi-dimensional y ta cuadra cu lo cual a keda acorda den e Programa di Gobernacion AVP-FUTURO 2025-2028: e transicion di energia sostenibel. E proyecto ta busca reduci emisionnan di CO2 pa combati cambio climatico y proteha nos medio ambiente e. Ademas, ta busca pa mehora salud publico door di baha e emision di gasnan toxiconan manera nitrogen oxide y particula fini. Y no menos importante: ta busca reduci dependencia di Aruba riba combustibel fosil cu ta wordo importa, y asina proteha nos economia contra e volatilidad di prijs di petroleo internacional. Gobierno ta consciente cu e tin un rol di ‘duna ehempel' door di demostra tanto na nos ciudadanonan como na sector priva cu un transicion  pa energia sostenibel ta factibel.

E vision di e programa aki ta bay mas leu. Union Europeo ta uzando Aruba como un programa piloto pa sirbi como ehempel pa otro islanan chikito y teritorionan di ultramar riba henter mundo. Esakinan ta un reconocemento internacional pa e dedicacion di Aruba na desaroyo sostenibel, y un refleccion directo di e ambicion di Gabinete AVP-FUTURO pa posiciona Aruba riba e mapa mundial como un lider den transicion di energia pa islanan.

Cu e proyecto acercando su fase final, gobierno ta prepara pa ricibi e entrega final di e proyecto for di Energynautics. Esaki ta inclui un Plan di Transicion: un strategia detaya pa e electrificacion den fase pa mayoría di e flota di auto gubernamental. Ademas, ta inclui un Maneho di Compra di vehiculonan electrico nobo, y un Plan di Maneho di Bateria pa sigura cu e baterianan ta wordo maneha na un manera sostenibel ora cu ya nan no ta adecua pa uzo den vehiculonan. Analisis anterior den e proyecto a mustra ya cu un reduccion di 15% den Total Cost of Ownership (TCO) ta alcansabel pa departamentonan manera DEZHI — e cifra aki ta papia pa su mes.

'E proyecto aki ta proba cu cu cooperacion internacional y un vision cla, Aruba por lidera den desaroyo sostenibel. Door di electrifica nos flota, nos no solamente ta spaar placa, nos ta asegura un futuro mas limpi, mas saludabel y mas resiliente pa tur Arubiano,' Minister Geoffrey Wever a comenta.

Cu e Programa GO drentando su fase final, Minister Wever lo sigui presenta e resultado y e roadmap di implementacion na nos ciudadanonan y stakeholdernan den e siguiente simannan. Esaki ta un paso mas den e direccion cu Gabinete AVP-FUTURO kier bay, cu ta pa crea un Aruba cu ta desaroya continuamente, cu ta tuma decisionnan strategico, y cu ta traha pa un futuro duradero pa generacionnan cu ta sigui.