Minister Wyatt-Ras ta subraya:
ORANJESTAD (AAN)-- Minister di Salud Publico Mervin Wyatt-Ras, den entrevista cu Matutino DIARIO a expresa, cu ningun persona tin cu acepta ningun abuso y mester bisa no na cualkier tipo di abuso.
“Specialmente na nos personanan di mas edad, nos ta haya hopi importante, y tambe e ministerio, pa zorg pa nan haya proteccion. Hopi adulto mayor ta biba nan so, y tin biaha nan ta biba cu nan yiu y nan ta bira victima tambe cu nan ta tuma nan suma di pensioen, y no ta duna nan suficiente cuminda, y nan ta haya hasta maltrato fisico of mental tambe, of ta zundra personanan cu tin Alzheimer, y e personanan cu ta wak pa nan, no ta acepta loke ta pasando cu nan, of no ta compronde y nan por bira victima di un otro maltrato pero tambe descuido”, e mandatario a señala.
Minister Wyatt-Ras a señala cu awendia, tambe hopi adulto mayor cu ta biba nan so, no tin e network pa yuda nan haci nan compras, cumpra nan cuminda, y esaki ta preocupacionnan cu e tin. P’esey nan tin e Direccion di Departamento encarga cu Adulto Mayor, cu ta haci e trabao, p’asina prepara pa pronto por papia di shelter, y ya caba tin personal apunta pa nan por bay wak kico ta e problematica, pa yuda tambe personanan den e casonan aki.
