Gobierno ta fortalece proteccion di nos patrimonio historico

*Diahuebs awor San Nicolas lo tin un otro monumento oficial

ORANJESTAD (AAN): Gobierno di Aruba ta fortalece su compromiso cu preservacion di nos patrimonio historico y cultural cu un programa nobo di conscientisacion y proteccion di monumentonan nacional. E anuncio a sosode dialuna mainta pa Prome Minister mr. Mike Eman dilanti oficina di Monumenten Bureau Aruba (MBA) na Schelpstraat, hunto cu director di MBA Raul Gei, Pastoor Andres Makowiec y arkitecto di restoracion di monumento Daphne Every.

Segun Prome Minister Mike Eman, Aruba ta enfrenta hopi reto den su desaroyo, pero dos di nan ta fundamental: e proteccion y preservacion di nos naturalesa y e proteccion di nos identidad como pueblo. “Nos monumentonan ta representa mas cu piedra y cement. Nan ta testigo fisico di nos historia, di nos cultura y di e alma Arubiano cu durante e generacionnan a expresa su mes den literatura, musica, arte y arkitectura. Pa esey ta importante cu nos conserva, restaura y proteha locual nos a hereda,” Eman a declara.

Como parti di e programa nobo, Gobierno lo inicia un proceso continuo di designacion di monumento, unda regularmente lo coloca un seyo oficial riba e edificionan cu a haya e status di monumento protehi. Tambe lo organisa varios anochi di informacion pa splica comunidad con e proceso ta funciona y kico e status di un edificio como monumento ta nifica pa e doño di e edificio. “E propietarionan ta keda doño di nan edificio. Tin oportunidad, tin apoyo y tin fondo special cu por yuda na restauracion. Nos kier cu nos comunidad ta bon informa tocante e posibilidadnan cu ta existi,” Eman a splica.

Durante e encuentro a anuncia oficialmente cu Kapel Emanuel na San Nicolas lo bira e siguiente monumento oficial di Aruba. E iniciativa aki a cuminsa durante e gestion di e anterior director di Monumenten Bureau, Yvonne Webb-Kock, y ta representa tambe un homenahe na su tata, arkitecto Virgilio Kock den feliz memoria, diseñador di e kapel Emanuel emblematico aki.

E proceso di investigacion y documentacion historico a wordo conduci cu apoyo di arkitecto di restoracion di monumento Daphne Every. Despues di varios estudio historico y conversacion cu e Obispado Catolico, a logra un acuerdo pa oficialisa e designacion. Gobierno a expresa su gratitud pa e cooperacion y permiso brinda pa e Obispado.

Pastoor Andres Makowiec a expresa su orguyo cu e reconocimiento. “Nos ta hopi orguyoso cu un di nos edificionan ta haya e reconocimento aki. Mescos manera cu ciudadnan rond mundo ta aprecia nan catedralnan y iglesianan historico, Aruba tambe mester aprecia y proteha su patrimonio religioso y arkitectonico,” Pastoor Makowiec a declara. Segun e vicario, Kapel Emanuel tin e caracteristicanan unico den Aruba. Su forma triangular, inspira den Santisima Trinidad, y su ubicacion riba Ser’i Mosa di San Nicolas ta hacie un edificio singular cu tin gran balor spiritual y arkitectonico. Director di Monumenten Bureau Aruba,

Raul Gei, a bisa cu e declaracion di Kapel Emanuel como monumento ta marca un momento special pa Aruba. “Esaki ta resultado di hopi trabou y investigacion. E kapel tin un gran balor historico y cultural. Nos ta invita henter comunidad, specialmente e habitantenan di San Nicolas, pa participa den e ceremonia y conoce mas tocante e patrimonio unico cu nos tin,” Gei a bisa.

Prome Minister Eman a conclui e conferencia di prensa cu un homenahe na Virgilio Kock.

“Pastoor Andres a referi na Antoni Gaudi y su obra monumental na España. Nos, humildemente, por bisa cu Aruba tambe tin su propio Gaudi den persona di Virgilio Kock, cu den e humildad di e circunstancianan di Aruba di su tempo a diseña algo hopi excepcional cu ta Kapel Emanuel.” Eman a remarca. “Den e calor di e kapel importante aki nos no solamente ta celebra arkitectura, pero tambe nos ta busca e palabra di Dios y e guia cu nos tur mester den un bida yen di reto y desafio. E edificio aki mester haci nos sinti emocion, sinti e presencia di nos creador y tambe recorda nos e responsabilidad cu nos tin pa cuida locual nos a hereda.” Cu e palabranan aki Prome Minister Eman a cera e mainta di momento di prensa.

Gobierno a anuncia tambe cu diahuebs na MFA Noord lo tin un atardi pa anochi di informacion unda comunidad por conoce mas tocante e proceso di declaracion di monumentonan, e responsabilidatnan di e propietarionan y e oportunidadnan di financiamiento disponibel pa restauracion. E charla ta cuminsa pa 6:30 pm.

Finalmente, e Prome Minister a invita henter comunidad pa participa den e ceremonia oficial na Kapel Emanuel, unda despues di misa lo coloca e seyo oficial di monumento protehi den presencia di famia Kock, entre nan Monica y Yvonne Kock, pa honra e memoria di Virgilio Kock, un gran arkitecto y diseñador Arubiano cu a laga un legado duradero pa Aruba.