Buki di Pret ta crece hunto cu e muchanan di Aruba

ORANJESTAD (AAN):  Fundacion Buki di Pret awe a lansa oficialmente e di seis edicion di nan buki popular pa vakantie.

Na Colegio Sagrado Curason na Savaneta, e prome ehemplar a wordo entrega

den un manera festivo na e conocido “Entertainer & Content Creator” Arubiano, Tarrick Ras. Mes

ora despues, e alumnonan di e scol tambe a ricibi nan propio ehemplar. Cu esaki, e distribucion

anual di Buki di Pret na tur muchanan di scol basico na Aruba, a cuminsa.

Mas cu un buki di vakantie

Loke seis aña pasa a cuminsa como un iniciativa pa ofrece muchanan actividadnan divertido durante

zomervakantie, awendia a crece bira un programa cu ta alcansa henter isla y cada aña ta alcansa

miles di mucha. E aña aki un biaha mas, aproximadamente 9.000 alumno di scolnan basico Arubiano

ta ricibi un ehemplar gratis di Buki di Pret.

Mas grandi y cu mas actividad cu nunca

E edicion nobo tin 104 pagina y ta contene 112 actividad y oferta pagabel of gratis, den e

categorianan conoci: flora y fauna, arts & crafts, diversion y weganan, deporte, educacional y

cuminda y drinks. E meta ta keda mescos: stimula muchanan pa ta activo, descubri cosnan nobo y

desaroya nan talento.

Stickernan nobo pa participantenan activo

Nobo e aña aki ta e programa di sticker di Buki di Pret. Muchanan por colecciona sticker durante e

actividadnan den cual nan ta participa y cu esaki nan por registra nan vakantie, literalmente den nan

propio buki. E stickernan ta haci participacion ainda mas divertido y ta stimula e muchanan pa

descubri diferente actividad.

Sistema di reservacion mehora

Debido na e creciente popularidad di Buki di Pret y e demanda pa mas actividad, e sistema di

reservacion anterior no tabata cumpli mas cu e deseonan di e mayornan y e participantenan. P’esey,

e aña aki, Buki di Pret ta traha cu un sistema di reservacion renoba. Actividadnan popular facilmente

por wordo reserva online. Tambe a agrega listanan di espera y participantenan ta ricibi

recordatorionan automatico via WhatsApp. Cu esaki, e fundacion kier haci e proceso di inscripcion

mas cla y percura cu e luganan disponibel wordo uza optimalmente.

Atencion extra pa muchanan vulnerabel

Mescos cu den e añanan anterior, Buki di Pret tambe ta organisa dianan di vakantie special pa

hobennan cu no tur ora por participa sin mas na actividadnan. Den colaboracion cu diferente

centronan di bario, organisacionnan social y boluntarionan, e muchanan aki ta wordo busca den nan

propio bario y acompaña pa excursionnan y actividadnan special riba e isla. "Nos ta kere cu tur

mucha tin derecho riba un vakantie dibertido, activo y inspira," iniciadora Kitty van der Knaap ta

bisa. "No tur famia tin e mesun posibilidadnan, pero danki na e apoyo di nos partnernan, nos por

asegura cu mas tanto mucha cu ta posibel por haya experiencianan nobo, pasa un bon rato y

descubri unda nan talento ta."

Pa Aruba, door di Aruba

Buki di Pret Aruba ta bira posibel danki na e compromiso di decenas di compania local,

asociacion, organisacion, boluntario y patrocinado. Danki na nan apoyo, e programa

por sigui crece cada aña y miles di mucha na Aruba por sigui beneficia di un zomer yen di

actividadnan dibertido y educativo.

Tocante Fundacion Buki di Pret

Fundacion Buki di Pret ta un organisacion non-profit cu ta dedica su mes na e bienestar y desaroyo di

muchanan na Aruba. E fundacion ta stimula muchanan pa ta activo, haya experiencianan nobo y

descubri nan talento. Door di actividadnan di vakantie accesibel pa tur hende, Buki di Pret kier

contribui na brinda oportunidadnan igual pa tur mucha riba nos isla.