Gobierno lo sigui coopera pa asina yuda engrandece e conocemento pa loke ta e tema di innovacion

 Aruba Innovation Summit 2024 a conta cu un sala completamente yen

ORANJESTAD (AAN): Diaranson mainta, Prome Minister Evelyn Wever-Croes a atende e Aruba Innovation Summit 2024, organisa pa Gobierno di Aruba y Futura. E tema di e evento tabata "EVOLUCION", y a enfoca riba Inteligencia Artificial (AI), y con lo por traha hunto cu tecnologia y cu otro ser humano.

                E conferencia aki a conta cu tres orador, cu a entretene e publico cu informacionnan importante riba e topico di innovacion y AI. E oradornan tabata señora Amy Gallo, un Best-Selling Author y un Workplace expert, cu a comparti su experticio riba maneho di situacionnan dificil y solucion di conflicto. Señor Eduardo Sanchez, Senior Vice President & Head of Cyber & Intelligence di Mastercard Latin America & Caribbean, a enfoca riba e uzo di AI pa siguridad cibernetico. Y señora Luenne Gomez-Pieters., Directora di Departamento di Impuesto na Aruba cu a toca e tema ”Liderando cambio y innovacion”.

                Prome Minister a indica cu na inicio di gobernacion di Gabinete Wever-Croes a pone innovacion "front and center", dunando e topico aki tur atencion necesario. E tema di AI ta uno importante, pasobra ya caba e sistema aki ta tuma over na momento cu un persona den su bida priva of pa trabou subi un plataforma pa busca informacion. Si ripara, den e siguiente dianan e informacion/topico aki cu a ser busca, ta sigui aparece riba e plataforma ey. P’esey ta importante pa tur hende, incluyendo Gobierno, siña con pa uza AI na nan beneficio, mirando cu e por ta di gran ayudo, enbes di ta un reto.

                E otro aspecto importante di AI ta pa siguridad cibernetico, mirando cu mas digitalisa e proceso nan ta, mas grandi e chens ta cu informacionnan y data sensitivo, manera informacion di salud di un persona, of informacionnan personal di Gobierno y organisacionnan, por wordo perdi of horta. Siguridad cibernetico ta proteha data importante, manteniendo asina e integridad di e departamentonan di Gobierno y organisacionnan priva.

                "Mi ta hopi contento cu Futura a organisa e evento aki cu e tema "EVOLUCION", cu ta un tema asina importante. E sala tabata completamente yen, mustrando asina cu hopi hende ta interesa den siña mas riba e tema di AI. Mi ta felicita Futura cu un otro conferencia exitoso, y sa cu Gobierno lo sigui coopera pa asina yuda engrandece e conocemento pa loke ta e tema di innovacion. Mi ta gradici tur esnan cu di un of otro manera a haci e conferencia aki posibel y na tur esnan cu a participa", Prome Minister a expresa.