Gobierno lo reuni cu lidernan di sindicatonan prome cu dia 2 di December

Sindicatonan a entrega manifiesto cerca Ministernan

ORANJESTAD (AAN): Lidernan di sindicatonan y empleadonan publico y semi publico a manifesta contra reduccion di salario di 12.6% 'tot nadere orde' y a marcha te dilanti di Bestuurskantoor pa entrega manifiesto cerca Ministernan.

Sindicatonan ta exigi pa Gobierno no negocia nan salario, respeta nan derechonan di trahador y transparencia. Nan no por cu mas recorte y nan no kier pa nan salario ta parti di negociacion cu Hulanda pa haya sosten di likides. Nan kier pa Gobierno elimina esaki completamente y nan no ta acepta e reduccion di 6.3% tampoco sin un dialogo.

Lidernan di sindicatonan a pidi Gobierno pa un dialogo y Prome Minister Evelyn Wever-Croes na prome lugar a gradici pa e manifestacion bay den un forma pacifico y cu nan tin comprension pa tur sacrificio di empleadonan publico. Nan lo trata e situacion diabierna durante un reunion di Conseho di Minister y cu lo reuni cu lidernan di sindicato prome cu 2 di December.   

Siman pasa Prome Minister a enfatisa cu ta un condicion cu Hulanda a duna pa asina Aruba haya e sosten di likidacion. Tambe Hulanda a pone como condicion cu e recorte mester ta “tot nadere orde”. E recorte di 12.6% ta conta pa tur compania estatal y tur compania estatal a presenta un declaracion di accountant cu nan a corta salario di 12.6%.

Gobierno su punto di salida ta cu TUR entidad estatal mester cumpli cu e recorte. Gobierno ta sigui monitorea y si un entidad no cumpli, lo tuma medida necesario. Prome Minister a enfatisa cu ta importante pa tur entidad estatal sigui realisa y comprende, cu sin e sosten di likides no por paga salarionan. Lo no tin placa pa cuido di salud, siguridad di nos cuerpo policial ni enseñansa. Aruba ta sigui depende di e sosten di likides por lo tanto mester sigui cumpli cu e recorte di 12.6%.