Gobierno kier yega na un solucion riba e debe di prestamo prome cu October 2023

ORANJESTAD (AAN): Secretario di Estado Alexandra van Huffelen, durante su bishita di trabou na islanan den Reino, diahuebs atardi a reuni cu Gobierno di Aruba pa trata diferente tema.

            Prome Minister Evelyn Wever-Croes hunto cu Minister di Finansas Xiomara Maduro a reuni cu señora van Huffelen riba diferente tema cu pa Aruba ta hopi relevante, principalmente a trata e tema financiero. “Mirando cu ya a pasa Presupuesto 2023 cu tin un surplus y Gobierno ta cumpli cu normanan y a sigui baha gasto di personal, ta haci cu riba e tereno aki no tin mucho problema mas y pa aña 2023 nos tin un aña hopi mas trankil nos dilanti”, Prome Minister a indica.

            Prome Minister a duna di conoce cu e tema principal riba agenda ta keda e debe di e prestamo di 900 miyon florin cu Aruba a haya di Hulanda durante e temporada di Covid. Riba esaki Gobierno kier yega na un solucion prome cu October 2023 teniendo na cuenta cu esaki ta e luna cu e ta caduca. “Aruba a haya e debe aki sin interes cu ta hopi bon pero pa otro aña mester tin claridad”.

            Den e reunion cu señora van Huffelen a elabora riba diferente alternativa pasobra Aruba no tin e placa ey pa paga. “E debe ta demasiado halto pa nos pagu'e pero si nos por yega na palabracionnan con nos por atende cu ne. Nos a papia riba diferente alternativa y nos lo sigui riba e tema akinan tambe”, Prome Minister a expresa.

            Un otro tema cu a haya atencion ta e historia di sclavitud. Hulanda ta envolviendo e islanan den reino pa por papia di e tema aki pasobra ta yega un momento cu Hulanda tambe lo bay duna su disculpa pa loke ta trata e historia di sclavitud. Esaki ta importante algo sigur di aplaudi e iniciativa di Hulanda pa envolve paisnan di reino den dje. A elabora con Aruba ta preparando e trayecto di awo pa 1 di Juli 2023 cu ta e momento cu nos ta recorda 160 aña cu a aboli sclavitud aki nan.

            Finalmente a trata e tema di reformanan, cu ta e cambionan cu mester implementa na Aruba pa nos tin un economia mas fuerte y mas resiliente pa den futuro nos mes por atende cu crisis. Esaki en cuadro di e landspakketnan. “Mi mester bisa cu Aruba ta bayendo hopi bon den esaki”, Prome Minister a enfatisa.

            Prome Minister a duna di conoce cu den e raportahe den e ultimo kwartaal, no tawatin ningun problema. Tin algun tema cu mester di mas atencion pero no tin ningun punto cu ta kedando atras considerablemente.

            “Mi mester bisa cu e tabata un bon reunion y danki na esfuerso di tur nos ciudadanonan di nos pais, nos profesionalnan cu ta traha den Gobierno y danki na e esfuerso di nos Minister di Finansas, nos ta mira un 2023 cu hopi menos problema financiero cu Hulanda manera nos tabatin den 2022. Esaki ta algo cu ta yena nos cu speransa y asina bo por pasa tambe riba tur discucion cu tabata tin y bay weita na cosnan importante. Por ehempel con nos ta bay diversifica nos economia di berdad cu no ta depende di turismo so, con nos ta bay mehora calidad di nos enseñansa, traha mas scol, percura cu nos cuido di salud ta miho, percura pa e cuido di nos grandinan ta miho, traha mas cas di cuido pa nos grandinan, drecha nos infrastructura y percura pa Aruba ta un luga sigur. Tin hopi trabou pa haci y aworaki nos por concentra riba e metanan riba termino largo mirando cu e metanan riba termino cortico ta wordo cumpli cu ne”,  Prome Minister Evelyn Wever-Croes a duna di conoce.