Conseho di Minister di Hulanda a aproba peticion di Gobierno:
ORANJESTAD (AAN) — Diabierna mainta den reunion di Conseho di Minister di Reino, na Den Haag, a wordo aproba e proposicion di Gobierno di Aruba, pa prolonga e termino di Gobernador Alfonso Boekhoudt.
“E periodo lo a vence 1 di Januari 2023. Pero Gobierno di Aruba, mirando e experiencia di señor Boekhoudt, y mirando e respet y cariño cu e ta goza di dje den e Comunidad di Aruba, a haci un apelacion na Gobernador Boekhoudt pa sigui un termino mas”, prome Minister Evelyn Wever-Croes a duna di conoce den conferencia di prensa, Diabierna di e siman aki.
E dignatario a indica cu Gobernador Boekhoudt a acepta y e ora ey gobierno a acerca Hulanda cu e proposicion aki, cu Diabierna mes a keda aproba pa Conseho di Minister di Reino.
Minister Presidente a informa cu e di dos termino di Gobernador Boekhoudt ta cuminza 1 Januari 2023 y lo termina 1 Januari 2029.
“Gobierno di Aruba ta felicita Gobernador Boekhoudt cu e nombramento aki y specialmente, den nomber di pueblo di Aruba cu a gradici Gobernador Boekhoudt pa su disponibilidad pa sigui sirbi comunidadnan den Reino”, Premier Wever-Croes a expresa.
