Señor Edwin Roos, director di WGK:
- En principio no tin nada pa stroba tuma un pensionado den servicio
ORANJESTAD (AAN) Señor Edwin Roos, director di Wit Gele Kruis, den entrevista cu DIARIO a indica cu locual WGK ta premira ta cu e grupo di Adulto Mayor cu mester di cuido, cada bez ta bira mas grandi, tanto di edad como den cantidad.
“Loke nos ta wak e ultimo añanan pa medio di nos POHnan y tambe cerca e docternan, ta cu e hendenan ta bira mas conciente di nan salud, y nan ta yega edadnan mas halto door di cuida nan mes, pero tambe, sin cu nan ta rekeri hopi atencion medico”, señor Roos a señala.
El a indica cu 20 aña pasa, ora e persona tabata yega edad di 60 plus, ya e tabata tin caba diferente problema cronico. Aworaki por wak cu nan ta hala mas den direccion di 70 aña.
“Binti aña pasa, 70, 75 aña tabata e edad promedio kizas, aworaki ta 10 aña mas caba; pues, tur esey nos manera di biba y di ban on cu otro mester incorpora e adultonan mayor mas den tur cos. Dus, mas nan ta keda participa den comunidad ta hopi miho pa nan salud, nan ta habil intelectualmente, etc.
Mi ta kere cu den hente e manera cu nos ta wak nos grandinan, toch probecha di e hecho cu nan ta mas saludabel, pues laga nan participa activamente. Pakico no tuma un hende cu bon experiencia, por ehempel den un organizacion manera nos, pa yuda. E por bin dos dia pa siman, dun’e un chens, lague bin participa anto esey ta promove cu nan ta keda mas saludabel y mas activo”, Director di Wit Gele Kruis a indica.
El a señala tambe cu loke mester duna semper ta incentivo, naturalmente. Pues cu un parti di nan salario no mester bay directamente na belasting, esaki ta un reto cu hopi pensionado tin pa bay traha, pero esaki no ta sentido comun. “Aunke bo kier keda ocupa, toch bo kier haya un recompensa acerca. Esey si mester evalua bon, pero en principio no tin nada cu ta stroba pa bo tuma un hende pensiona, den servicio”, señor Edwin Roos, director di WGK a remarca.
